धाराशिव: धाराशिवचे उपजिल्हाधिकारी शिरीष यादव आणि त्यांच्या पत्नी प्रतीक्षा यादव यांच्यावर लाचलुचपत प्रतिबंधक विभागाने (ACB)पुण्यात गुन्हा दाखल केला आहे. उत्पन्नापेक्षा जास्त संपत्ती जमवल्याचा आरोप त्यांच्यावर आहे. विशेष म्हणजे, अटकपूर्व जामीन मिळाल्यानंतर यादव पुन्हा धाराशिवला रुजू झाले असून त्यांच्याकडे अतिरिक्त जिल्हाधिकारी पदाचा पदभार देण्यात आला आहे. यामुळे लाचखोर अधिकाऱ्याला शासनाने बक्षीस दिले आहे का? असा प्रश्न उपस्थित केला जात आहे.
शिरीष यादव हे सध्या धाराशिवला निवडणूक विभागाचे उपजिल्हाधिकारी असून, विधानसभा निवडणुकीपूर्वी त्यांच्यावर पुण्यात गुन्हा दाखल झाला होता. त्यानंतर ते गायब झाले होते. निवडणूक संपताच, ते पुन्हा धाराशिवला जॉईन झाले असून, प्रभारी अप्पर जिल्हाधिकारी पदाचा पदभार देण्यात आला आहे.
काय आहे प्रकरण ?
पुण्यात झोपडपट्टी पुनर्वसन विभागाचे उपमुख्य कार्यकारी अधिकारी असताना यादव यांनी बेकायदेशीररित्या १ कोटी ३८ लाख ७४ हजार रुपये इतकी संपत्ती जमवली होती. ACB च्या गोपनीय चौकशीत यादव यांच्या पत्नीने खोटे प्रतिज्ञापत्र सादर केल्याचे उघड झाले आहे. त्यामुळे त्यांच्यावर फसवणुकीचा आरोप देखील लावण्यात आला आहे.
९ वर्षांपूर्वी पुण्यातील झोपडपट्टी पुनर्वसन प्राधिकरणाचा (एसआरए) उपमुख्य कार्यकारी अधिकारी असताना यादव यांना पाच लाखांची लाच घेताना ‘एसीबी’ने अटक केली होती. त्याच्या घराच्या झडतीत ५१ लाख रुपये रोख, २२ लाख रुपये किमतीचे सोन्या-चांदीचे दागिने व पाच महागडे मोबाइल जप्त करण्यात आले होते.
यादव यांनी या संपत्तीबाबत आपल्याला काहीच माहिती नसल्याचे सांगितले होते. त्यामुळे संपत्तीचा स्रोत उलगडण्यात एसीबीला अद्याप यश आलेले नाही. विविध बँकांत असलेल्या त्याच्या लॉकरमध्येही मोठ्या प्रमाणावर मौल्यवान ऐवज असण्याचा एसीबीला संशय आहे. त्याची तपासणी केली जात आहे. यादवच्या मोबाइलमध्ये एचडीएफसी, आयसीआयसीआय, स्टेट बँक ऑफ इंडियाचे जमा शिल्लक रकमेबाबत संदेश आहेत. यादवने विदेशातही दौरे केल्याची माहिती आहे. यापूर्वी पुणे मनपात बांधकाम टीडीआर घोटाळाप्रकरणी यादववर गुन्हा दाखल आहे. २००७ ते २०१२ दरम्यान त्याची उघड चौकशी केली असता त्याच्याकडे अडीच लाखांची अपसंपदा सापडली होती.
