तेर – तेर येथे एका महिलेसह तिच्या पतीला मारहाण करण्यात आली, तसेच तिच्या मुलाला धमकी देण्यात आल्याची घटना घडली आहे. या प्रकरणी ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, अस्मा अफसर काझी (वय ५० वर्षे) आणि त्यांचे पती हे दि. १७.०२.२०२५ रोजी सायंकाळी ५ वाजता त्यांच्या घरी असताना बाबा सय्यद, अजीज सय्यद, साजीद सय्यद, वाजीद सय्यद, शरीफा साजीद सय्यद, अफरीन वाजीद सय्यद, सरफराज बाबा सय्यद आणि शन्नु अजीज सय्यद या आरोपींनी गैरकायद्याची मंडळी जमवून त्यांना शिवीगाळ केली. तसेच, लाथाबुक्यांनी मारहाण करून जखमी केले.
या मारहाणीत अस्मा काझी आणि त्यांचे पती जखमी झाले आहेत. याशिवाय, फिर्यादीचा मुलगा अमीर काझी याला ‘तू गॅरेजवळ ये, तुला सोडणार नाही’ अशी धमकी आरोपींनी दिली.
अस्मा काझी यांनी दि. १८.०२.२०२५ रोजी ढोकी पोलीस ठाण्यात या घटनेची प्रथम खबर दिली. त्यानुसार, पोलिसांनी आरोपींविरुद्ध भा.न्या.सं. कलम ११५, ३५२, ३५१(२), ३५१(३), १८९(२), १९० आणि १९१(२) अन्वये गुन्हा दाखल केला आहे. या प्रकरणाचा अधिक तपास ढोकी पोलीस करत आहेत.
