धाराशिव: ठाणे जिल्ह्यातून बेपत्ता झालेल्या एका अल्पवयीन मुलीला स्थानिक गुन्हे शाखेने धाराशिव येथून ताब्यात घेतले आहे. ही मुलगी २४ डिसेंबर २०२४ रोजी बेपत्ता झाली होती आणि तिच्या अपहरणाचा गुन्हा वागळे इस्टेट पोलीस ठाण्यात दाखल करण्यात आला होता.
स्थानिक गुन्हे शाखेचे पथक धाराशिव शहरातील जुना बस डेपो येथील किनारा हॉटेल जवळ पेट्रोलिंग करत असताना त्यांना रस्त्याच्या कडेला एक लहान मुलगी रडत असल्याचे दिसले. पथकाने मुलीची विचारपूस केली असता ती बेपत्ता झालेली मुलगी असल्याचे समजले.
पथकाने मुलीच्या वडिलांशी संपर्क साधला असता त्यांनी मुलीच्या अपहरणाची माहिती दिली. त्यानंतर पथकाने वागळे इस्टेट पोलीस ठाण्याशी संपर्क साधून मुलीला ताब्यात घेतले. मुलीला तात्पुरत्या स्वरूपात धाराशिव पोलीस ठाण्यात ठेवण्यात आले असून तिच्या पालकांना तिचा ताबा देण्यात येणार आहे.
ही कामगिरी स्थानिक गुन्हे शाखेचे सहाय्यक पोलीस निरीक्षक अमोल मोरे, सचिन खटके, पोलीस हवालदार विनोद जानराव, समाधान वाघमारे, मपोहेकॉ शैला टेळे, पोलीस नाईक नितीन जाधवर, बबन जाधवर, चालक पोलीस अंमलदार विनायक दहिहंडे यांच्या पथकाने पोलीस अधीक्षक संजय जाधव आणि अपर पोलीस अधीक्षक गौहर हसन यांच्या मार्गदर्शनाखाली केली आहे.
