नळदुर्ग : तुळजापूर तालुक्यातील बाभळगाव येथील पुलाखाली तीन मृतदेह आढळल्याने परिसरात खळबळ उडाली आहे. यामध्ये एक महिला आणि दोन पुरुषांचा समावेश आहे. मृतदेह दोन दिवसांपूर्वी पाण्यात पडल्याचा पोलिसांचा अंदाज आहे.
सोलापूर-हैदराबाद महामार्ग क्रमांक 65 वर बाभळगाव गावाजवळील पुलाखाली हे मृतदेह आढळून आले. स्थानिकांनी मृतदेह पाहिल्यानंतर तात्काळ पोलिसांना माहिती दिली. घटनेची माहिती मिळताच नळदुर्ग पोलिस घटनास्थळी दाखल झाले. पोलिसांनी मृतदेह पाण्याबाहेर काढले असून त्यांची ओळख पटवण्याचे काम सुरू आहे.
आतापर्यंत एका पुरुषाची ओळख पटली असून तो आनंदनगर, मुरूम येथील रहिवासी असल्याचे समोर आले आहे. महिला आणि दुसऱ्या पुरुषाची ओळख पटवण्याचे काम सुरू आहे.
प्राथमिक तपासात मृत्यूचे कारण समजू शकले नसल्याने पोलिसांनी घातपात की अपघात या दृष्टीने तपास सुरू केला आहे. मृतदेहांचे शवविच्छेदन करण्यात येणार असून त्यांचा अहवाल आल्यानंतर मृत्यूचे नेमके कारण स्पष्ट होईल, असे पोलिसांनी सांगितले. दरम्यान, या घटनेमुळे परिसरात भीतीचे वातावरण पसरले आहे.
हेही वाचा
बाभळगाव पुलाखाली आढळलेल्या तिन्ही मृतदेहांचा उलगडा
बाभळगाव ते जळकोट: यमाच्या रस्त्याची दाहकता !
Video
