तुळजापूर | तुळजापूर येथील श्री तुळजाभवानी मंदिर परिसरात दर्शनासाठी आलेल्या भाविक महिलेच्या गळ्यातील सुमारे ६० हजार रुपये किमतीचे सोन्याचे दागिने अज्ञात चोरट्याने गर्दीचा फायदा घेत लंपास केल्याची घटना घडली आहे. या प्रकरणी तुळजापूर पोलीस ठाण्यात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, लक्ष्मणसिंह शिवपालसिंह ठाकुर (वय ५६, रा. पूर्व सहयोगनगर, बीड) हे आपल्या पत्नीसह श्री तुळजाभवानी देवीच्या दर्शनासाठी तुळजापूर येथे आले होते. दि. २९ जुलै २०२६ रोजी दुपारी १२.४५ ते १.१५ या वेळेत होम कट्टा ते जिजाऊ महाद्वार या मार्गाने बाहेर पडत असताना गर्दीचा फायदा घेत अज्ञात व्यक्तीने त्यांच्या पत्नीच्या गळ्यातील १६ ग्रॅम वजनाचे सोन्याचे दागिने चोरून नेले.
चोरीस गेलेल्या दागिन्यांची किंमत सुमारे ६० हजार रुपये असल्याचे फिर्यादीत नमूद करण्यात आले आहे.
लक्ष्मणसिंह ठाकुर यांच्या फिर्यादीवरून तुळजापूर पोलीस ठाण्यात भारतीय न्याय संहिता (BNS) कलम ३०३(२) अन्वये अज्ञात आरोपीविरुद्ध गुन्हा दाखल करण्यात आला असून, पोलीस पुढील तपास करत आहेत.
