तुळजापूर : बँकेने ड्रायव्हर म्हणून कामावर ठेवले आणि त्याने ८५ लाख रुपये पळवले

तुळजापूर – ATM मशीनमध्ये पैसे भरण्यासाठी महिंद्रा बोलेरो गाडीत ठेवलेली पंच्याऐंशी लाख रुपये रक्कम वाहनावर ड्रायव्हर म्हणून काम करणाऱ्या सचिन पारसे याच्यासह तिघांनी पळवून नेली होती. पोलिसांनी तिन्ही आरोपीना जेरबंद करून पळवलेली रक्कम हस्तगत केली आहे.

फिर्यादी नामे- वैभव शंकर शेरकर, वय 26 वर्षे, व्यवसाय खाजगी नोकरी (हिताची कॅश मॅनेजमेंट ॲण्ड सर्व्हिसेस प्रा.लि. छत्रपती संभाजीनगर) यांनी फिर्यादी दिली की हिताची कॅश मॅनेमेन्ट ॲण्ड सर्विसेस च्या वाहनावर ड्रायव्हर म्हणून काम करणारा सचिन विलास पारसे, रा. दत्तनगर, तेरणा कॉलेज जवळ धाराशिव ता. जि. धाराशिव एक अनोळखी इसम यांनी दि. 22.03.2024 रोजी 16.00 वा. सु. तुळजापूर मधील नळदुर्ग रोड वरील एचडीएफसी बॅके समोरुन ATM मशीनमध्ये भरण्यासाठी महिंद्रा बोलेरो क्र एमएच 04 जेके 4407 च्या लॉकरमधील लोखंडी पेटी मध्ये ठेवलेली रोख रक्कम 85,00,000₹ हवा भरुन येतो असे सांगून चोरुन नेली आहे, यावरुन दि. 23.03.2024 रोजी तुळजापूर पो. ठाणे गुरनं 132/2024 येथे 406, 409, 420, 381, 120(ब), 34 भा.दं.वि.सं. अन्वये गुन्हा नोंदवला आला होता.

याप्रकरणी पोलिसांनी तपासाची चक्रे फिरवून आरोपी नामे – रवि किसन नामदास, रा. जाणकर नगर सोलापूर यास त्याने गुन्ह्यात वापरलेली मोटरसायकल व 20,50,000₹ रोख रक्कमेसह ताब्यात घेवून पुढील तपास कामी तुळजापूर पोलीस ठाणे येथे हजर केले. तसेच गुन्ह्यातील मुख्य आरोपी सचिन पारसे व महेश वर्तक हे कर्नाटक मधील गुंडील पेठ जि. चामराजनगर येथे असल्याची गोपनिय माहिती मिळाल्यावरुन सपोनि चासकर व पथक हे सदर ठिकाणी रवाना झाले व त्यांनी नमुद दोघांना ताब्यात घेवून त्यांच्याकडून 4,81,500₹ जप्त केले आहेत. सदर आरोपींना अटक करण्यासाठी गुंडील पेठ पोलीस ठाण्याचे प्रभारी अधिकारी पोलीस निरीक्षक परशिव मुर्ती व पोलीस उप निरीक्षक साहेब गौडा यांनी विशेष मदत केली. त्यानंतर अटक आरोपी रवि नामदास यांचे कडे स्थानिक गुन्हे शाखेचे पोलीस निरीक्षक वासुदेव मोरे, तुळजापूर पोलीस ठाण्याचे सपोनि भालेराव, चासकर, पोउपनि धनुरे यांनी बारकाईने व कौशल्याने पुन्हा विचारपुस करुन त्याचेकडून गुन्ह्यातील गेला माला पैकी, उर्वरीत 59,50,000 ₹ (एकोनसाठ लाख पन्नास हजार रुपये) हस्तगत करण्यात आलेले आहेत. तसेच गाडी भाड्यासाठी दिलेले 5,000₹ सुध्दा जप्त केलेले आहेत. अशा प्रकारे एकुण 84,86,500₹ जप्त केलेले आहेत. सदरील तीनही आरोपी पोलीस कोठडीत असुन तुळजापूर पोलीस ठाण्याचे सपोनि भालेराव अधिक तपास करत आहेत.