तुळजापूर: संपूर्ण राज्याला हादरवून सोडणाऱ्या तुळजापूर ड्रग्ज प्रकरणाचा कथित सूत्रधार आणि माजी नगराध्यक्षा अर्चना गंगणे यांचे पती, विनोद उर्फ पिटू गंगणे, याला अखेर पोलिसांनी अटक केली आहे. शुक्रवारी सायंकाळी जिल्हा व सत्र न्यायालयाने अटकपूर्व जामीन अर्ज फेटाळताच, पोलिसांनी न्यायालयाच्या आवारातच त्याच्या मुसक्या आवळल्या. या अटकेमुळे तुळजापूर शहरात नागरिकांनी समाधान व्यक्त केले आहे.
न्यायालयात नाट्यमय घडामोडी
जिल्हा व सत्र न्यायाधीश श्रीमती टी . जी. मिटकरी यांच्यासमोर दिवसभर चाललेल्या सुनावणीअंती न्यायालयाने पिटू गंगणे याचा अटकपूर्व जामीन अर्ज फेटाळून लावला. निकालानंतर गंगणे यांच्या वकिलांनी उच्च न्यायालयात अपील करण्यासाठी ७२ तासांची मुदत देण्याची मागणी केली. मात्र, न्यायालयाने ही मागणी स्पष्टपणे फेटाळून लावली, ज्यामुळे पोलिसांच्या अटकेचा मार्ग मोकळा झाला. पोलिसांनी क्षणाचाही विलंब न लावता गंगणेला ताब्यात घेतले.
तपास यंत्रणेला मोठे यश, अधीक्षक खोखर आणि ऍड. देशमुख यांची निर्णायक भूमिका
या प्रकरणात सुरुवातीला पोलिसांवर ढिसाळ तपासाचा आरोप होत होता. मात्र, पोलीस अधीक्षक म्हणून रितू खोखर यांनी पदभार स्वीकारल्यानंतर तपासाला प्रचंड गती आली. त्यांच्या कठोर भूमिकेमुळेच गंगणेचे दिवस भरले असल्याची चर्चा आहे. आज न्यायालयात सरकार पक्षाकडून ऍड. महेंद्र देशमुख यांनी अत्यंत प्रभावी युक्तिवाद केला. त्यांनी गंगणे हाच या प्रकरणाचा मुख्य सूत्रधार असल्याचे पुराव्यानिशी न्यायालयासमोर मांडले, जे या अटकेत निर्णायक ठरले.
राजकीय लागेबांधे आणि जनतेचा प्रतिसाद
पिटू गंगणे हा स्थानिक आमदाराचा अत्यंत लाडका आणि जवळचा कार्यकर्ता म्हणून ओळखला जातो. त्याच्या या राजकीय संबंधांमुळे कारवाई होणार की नाही, याबाबत जनतेत साशंकता होती. मात्र, आजच्या अटकेनंतर या प्रकरणाचा तपास योग्य दिशेने जात असल्याची भावना निर्माण झाली असून, नागरिकांमध्ये समाधानाचे वातावरण आहे.
गंगणेच्या अटकेमुळे आता या ड्रग्ज रॅकेटमधील इतर फरार आरोपी आणि पडद्यामागील अनेक मोठ्या नावांची धाकधूक वाढली आहे. या अटकेमुळे तपासात आणखी महत्त्वाचे धागेदोरे हाती लागण्याची शक्यता वर्तवण्यात येत आहे.
हेही वाचा
तुळजापूर ड्रग्ज प्रकरण : पाताळयंत्री सूत्रधार जेरबंद: व्यवस्थेच्या शुद्धीकरणाची ही नांदी ठरो!
