धाराशिव – तुळजापूर ड्रग्ज प्रकरणाचा तपास सुरू असताना राजकीय वातावरण मात्र ढवळून निघाले आहे! काँग्रेस जिल्हाध्यक्ष ऍड. धीरज पाटील यांनी भाजपवर थेट आरोप करताच भाजपचे माजी नगराध्यक्ष सचिन रोचकरी यांनी जोरदार प्रत्युत्तर देत या वादाला चांगलीच धार दिली आहे.
पोलीस कारवाईत ‘१० इन, ६ आउट’ – पण मोठे मासे कुठे?
तामलवाडी पोलिसांनी आतापर्यंत १६ पैकी १० जणांना अटक केली आहे. त्यापैकी ६ जण तुरुंगात, ४ जण पोलीस कोठडीत, तर अजूनही ६ आरोपी फरार आहेत. विशेष म्हणजे, चार जणांची नावे पोलिसांनी गुप्त ठेवली आहेत, यामुळे अनेक तर्क-वितर्कांना उधाण आले आहे.
काँग्रेसचा घणाघात – भाजपचा ड्रग्ज रॅकेटशी संबंध?
धीरज पाटील यांनी भाजपवर थेट आरोप करत म्हटले की, “या रॅकेटमध्ये भाजपचे कार्यकर्तेच सक्रिय आहेत आणि त्यांना भाजप आमदार वाचवत आहेत!” त्यांनी या प्रकरणात सीडीआर आणि आर्थिक व्यवहार तपासण्याची मागणी केली आहे.
“मुख्य सूत्रधार पकडल्याशिवाय सत्य बाहेर येणार नाही!” असे ठणकावून सांगत त्यांनी नार्को टेस्ट आणि एसआयटी चौकशीची मागणी केली आहे.
रोचकरींची पलटवाराची बॉम्बार्डिंग – ‘वैफल्यग्रस्त पाटलांची वायफळ बडबड’
काँग्रेसच्या आरोपांवर भाजपनेही जोरदार प्रत्युत्तर दिले आहे. माजी नगराध्यक्ष सचिन रोचकरी यांनी पाटील यांच्यावर टीका करत,
“विधानसभा पराभवाने पाटील वैफल्यग्रस्त झाले आहेत. त्यांनी हवेत बाण मारण्यापेक्षा ठोस पुरावे पोलिसांना द्यावेत!” असे सुनावले.
त्यांनी स्पष्ट केले की, “भाजप कोणत्याही आरोपीला वाचवणार नाही, कोणीही दोषी आढळल्यास कारवाई होणारच!”
२५ हजार देऊन अल्पवयीन मुलांचा वापर – धक्कादायक खुलासा!
या प्रकरणात आणखी एक धक्कादायक गोष्ट समोर आली आहे. ड्रग्ज तुळजापुरात पोहोचवण्यासाठी अल्पवयीन मुलांना २५ हजार रुपये देऊन त्यांचा वापर केला जात होता!
मुंबई, पुणे आणि सोलापूर मार्गे येणाऱ्या ड्रग्जला पोलिसांची चाहूल लागू नये म्हणून मुलांना टोल नाके पार करण्यासाठी वापरले जात होते. हे रॅकेट गेल्या चार वर्षांपासून सक्रिय असून सत्ताधाऱ्यांचे वरदहस्त असल्याचा आरोप करण्यात आला आहे.
मुख्य सूत्रधार अद्याप मोकाट – पुढे काय?
तुळजापूर ड्रग्ज प्रकरणाचा तपास अजूनही अपूर्ण आहे. मुख्य आरोपी फरार असून, त्यांना पाठीशी घालणारे कोण? हा प्रश्न अद्याप अनुत्तरित आहे.
धीरज पाटील यांनी “मुख्य सूत्रधार पकडले नाहीत, तर काँग्रेस जनआंदोलन उभारेल!” असा इशारा दिला आहे.
तर भाजपनेही “कोणत्याही आरोपीची गय केली जाणार नाही!” असे ठणकावून सांगितले आहे.
तुळजापूरमध्ये ड्रग्ज रॅकेटला राजकीय कवच?
या प्रकरणात कोण खरे आणि कोण खोटे, याचा फैसला लवकरच होईल. मात्र, सध्या तुळजापूरमध्ये राजकीय कुरघोडीचे राजकारण तापले आहे.
ड्रग्जच्या विळख्यात अडकलेल्या तरुण पिढीला वाचवण्यासाठी हे राजकीय आरोप-प्रत्यारोप बाजूला ठेवून सत्य बाहेर येईल का?
हा प्रश्न मात्र तुळजापूरकरांच्या मनात घर करून बसला आहे!
