तुळजापूर – शहरातील नळदुर्ग रोडवरील श्री नाथ लॉन्स समोर दोन कारची समोरासमोर धडक होऊन झालेल्या अपघातात सात जण जखमी झाले आहेत. यामध्ये चार जण गंभीर तर तीन जण किरकोळ जखमी झाले आहेत. जखमींवर तुळजापूर उपजिल्हा रुग्णालयात प्राथमिक उपचार करून पुढील उपचारासाठी धाराशिव जिल्हा रुग्णालयात हलविण्यात आले आहे.
ही दुर्घटना आज दुपारी सव्वाचारच्या सुमारास घडली. नळदुर्गकडे जाणारी अल्टो कंपनीची वॅगनार (क्रमांक MH12 NU0228) आणि तुळजापूरकडे येणारी हुंडाई कंपनीची अल्कायझर (क्रमांक MH25BA 8831) यांच्यात ही धडक झाली. अपघातात वॅगनारमधील चार प्रवासी तसेच अल्कायझरमधील तीन प्रवासी जखमी झाले.
गंभीर जखमींची नावे पुढीलप्रमाणे आहेत:
- अपर्णा घाटे (49 वर्षे, पुणे)
- वैदही घाटे (26 वर्षे, पुणे)
- चिंतामणी घाटे (55 वर्षे, पुणे)
- पद्मावती नारायण घाटे (83 वर्षे, पुणे)
अपघातानंतर 108 रुग्णवाहिकेच्या मदतीने जखमींना तातडीने उपजिल्हा रुग्णालयात दाखल करण्यात आले. तेथे वैद्यकीय अधीक्षक चोरमले आणि डॉक्टर अविनाश ढगे, प्रणिता गाडेकर, अंजली घाटे, श्रीधर जाधव, राठोड, गणेश पाटील यांनी प्राथमिक उपचार केले. नंतर गंभीर जखमींना पुढील उपचारासाठी धाराशिव जिल्हा रुग्णालयात हलविण्यात आले.
अपघातात दोन्ही कारचे मोठ्या प्रमाणात नुकसान झाले असले तरी सुदैवाने जीवितहानी टळली. अपघाताची माहिती मिळताच पोलीस निरीक्षक रवींद्र खांडेकर यांच्या आदेशाने पोलीस कॉन्स्टेबल गणेश पतंगे, अनुप गायकवाड आणि गोवर्धन माने यांनी घटनास्थळी धाव घेतली.
दरम्यान, पुजारी नगर फाऊंडेशनचे अध्यक्ष गणेश पुजारी यांनी जखमींना रुग्णालयात पोहोचवण्यासाठी तत्काळ मदतकार्य केले.
