फसवणूक करणारा प्रवासी निघाला मुख्याध्यापक; आगार प्रमुखाने दिली होती थेट परिवहन मंत्र्यांच्या नावाने चालकाला घरी बसवण्याची धमकी!

 तुळजापूर / धाराशिव – एसटी बसमध्ये बनावट दिव्यांग कार्ड वापरून शासनाची फसवणूक करणाऱ्या प्रकरणाला आता एक मोठे व धक्कादायक वळण मिळाले आहे. महिला वाहक व चालकाशी हुज्जत घालून अरेरावी करणारा प्रवासी छगन बापूराव लोखंडे हा दुसरा तिसरा कोणी नसून तुळजापूर येथील ‘नवीन मराठी शाळा, वेताळनगर’ या शाळेवर चक्क मुख्याध्यापक (Headmaster) पदावर कार्यरत असल्याची माहिती समोर आली आहे. एका जबाबदार पदावर राहून शासकीय पगार घेणारा मुख्याध्यापक स्वतः बोगस दिव्यांग कार्ड तयार करून एसटी महामंडळाची फसवणूक करत असल्याचे उघड झाल्याने शैक्षणिक व प्रशासकीय वर्तुळात प्रचंड खळबळ उडाली आहे.

मंत्र्यांचे नाव घेऊन चालकाला धमकी: ‘तुला कायमचा घरी बसवीन!’

या संपूर्ण प्रकरणात तुळजापूरचे आगार प्रमुख (DM) राम शिंदे यांची भूमिका अत्यंत संशयास्पद आणि प्रशासकीय शिस्तीला काळीमा फासणारी ठरली आहे. मुख्याध्यापक लोखंडे याचे बोगस कार्ड महिला वाहकाने पकडल्यानंतर, आगार प्रमुख राम शिंदे यांनी शासकीय नियमांची पायमल्ली करत आपल्या अधिकारांचा गैरवापर केला.

शिंदे यांनी फिर्यादी चालक उमेश दिलीप पवार आणि महिला वाहकावर दबाव आणताना, “मी या महिला वाहकाची व चालकाची तक्रार थेट मीडियात आणि राज्याचे परिवहन मंत्री प्रताप सरनाईक यांच्याकडे करून दोघांना तात्काळ निलंबित करायला लावीन, माझी पोहोच वरपर्यंत आहे,” अशी उघड धमकी दिली होती. एवढेच नव्हे तर, “तुला कायमचा घरी बसवीन आणि मीडियात बदनामी करीन,” अशी दमदाटी करत त्यांनी बोगस कार्ड फाडून पुरावा नष्ट करण्याचा बेकायदेशीर आदेश दिला होता. राम शिंदे यांची दीड महिन्यापूर्वी परंडा येथे बदली झाली आहे. 

• ‘पालकमंत्री व परिवहन मंत्री प्रताप सरनाईक यांच्या धाराशिव जिल्ह्यात बोगस दिव्यांग प्रमाणपत्रांचे रॅकेट?’; सखोल चौकशीसह आरोपींच्या अटकेची मागणी

धाराशिव जिल्ह्याचे पालकमंत्रीपद आणि राज्याचे परिवहन मंत्रीपद हे नामदार प्रताप सरनाईक यांच्याकडे आहे. त्यांच्याच जिल्ह्यात स्वतःच्या खात्याच्या (एसटी) सेवेत अशा प्रकारे बोगस दिव्यांग प्रमाणपत्रांचा वापर करून महामंडळाला लुटले जात असल्याचे या घटनेमुळे चव्हाट्यावर आले आहे. धाराशिव जिल्ह्यात अशा अनेक शासकीय व निमशासकीय कर्मचाऱ्यांनी बनावट दिव्यांग प्रमाणपत्रे काढून एसटी सवलतीचा आणि शासकीय योजनांचा गैरफायदा घेतला असल्याचा संशय व्यक्त केला जात आहे. त्यामुळे परिवहन मंत्र्यांनी या संपूर्ण प्रकरणाची विशेष पथकामार्फत (SIT) सखोल चौकशी करावी, अशी मागणी जोर धरत आहे.

प्रमुख मागण्या:

• तात्काळ अटक करा: एसटी कर्मचाऱ्यांवर अरेरावी करून शासकीय कामात अडथळा आणणारे आणि बनावट कार्ड वापरणारे मुख्याध्यापक छगन बापूराव लोखंडे व पुरावा नष्ट करण्यास भाग पाडणारे आगार प्रमुख राम शिंदे या दोघांना पोलिसांनी तात्काळ अटक करावी.

• शासकीय सेवेतून निलंबन: एका शिक्षण संस्थेवर मुख्याध्यापक असलेल्या लोखंडे यांच्यावर शिक्षण विभागाने तत्काळ बडतर्फीची कारवाई करावी, तसेच अधिकारांचा गैरवापर करणाऱ्या आगार प्रमुख राम शिंदे यांना एसटी महामंडळाने निलंबित करावे.

• जिल्हास्तरीय दिव्यांग प्रमाणपत्रांची तपासणी: धाराशिव विभागातील सर्व सवलतधारक दिव्यांग पासेस आणि प्रमाणपत्रांची फेरतपासणी करून बोगस रॅकेटचा पर्दाफाश करण्यात यावा.