प्रेमप्रकरणाच्या वादातून हत्येचा आरोप
मिळालेल्या माहितीनुसार, समीर पटेल याचे तुळजापूर शहरातील एका तरुणीसोबत प्रेमसंबंध होते. हे प्रकरण यापूर्वी मिटवण्यात आले होते. मात्र, याच प्रकरणाचा राग मनात धरून मुलीच्या कुटुंबीयांनी अमीर पटेल आणि त्याच्यासोबत असलेल्या अरबाज सय्यद यांना लक्ष्य केल्याचा आरोप जखमी तरुण आणि त्याच्या नातेवाईकांनी केला आहे.
कुटुंबातील सदस्यांना ओलीस ठेवून तरुणाला जबरदस्तीने घेऊन जाण्यात आले. त्यानंतर त्याला बेदम मारहाण करण्यात आली. या मारहाणीत समीर पटेल याचा मृत्यू झाला, तर अरबाज सय्यद गंभीर जखमी झाला, असा आरोप करण्यात येत आहे.
माजी नगराध्यक्ष संतोष कदम अटकेत
या प्रकरणात तुळजापूरचे माजी नगराध्यक्ष संतोष परमेश्वर कदम यांना अटक करण्यात आल्याची माहिती यापूर्वी देण्यात आली होती. तसेच पोलीस उपअधीक्षक सचिन पांडकर यांनी दोन आरोपींना अटक करण्यात आली असून, अन्य दोन आरोपींचा शोध सुरू असल्याची माहिती दिली होती.
दरम्यान, संतोष परमेश्वर कदम यांचे नाव यापूर्वी ड्रग्ज प्रकरणातही आरोपी म्हणून चर्चेत आले होते. आता तरुणाच्या हत्या प्रकरणात त्यांना अटक झाल्याने तुळजापूरच्या राजकीय आणि सामाजिक वर्तुळात चर्चा सुरू झाली आहे.
१७ आरोपी असल्याची चर्चा
या हत्याकांडात एकूण १७ आरोपी सहभागी असल्याची चर्चा शहरात सुरू आहे. मात्र, आरोपींची अधिकृत संख्या आणि प्रत्येकाची भूमिका याबाबत पोलिसांकडून अद्याप स्पष्ट माहिती समोर आलेली नाही. त्यामुळे या प्रकरणाचा तपास महत्त्वाचा ठरणार आहे.
अरबाज सय्यदवर धाराशिवमध्ये उपचार
या घटनेत गंभीर जखमी झालेल्या अरबाज सय्यद याच्यावर धाराशिव येथील शासकीय रुग्णालयात उपचार सुरू आहेत. अरबाज सय्यद आणि त्याचे नातेवाईक अजहर सय्यद यांचे म्हणणे या प्रकरणात महत्त्वाचे ठरणार आहे. त्यांच्या आरोपांमधून घटनेचा घटनाक्रम समोर येण्यास मदत होऊ शकते.
पोलिसांच्या तपासाकडे लक्ष
या प्रकरणामुळे तुळजापूर शहरात मोठी खळबळ उडाली आहे. हत्येमागील नेमके कारण काय, किती जणांचा सहभाग आहे, तसेच घटनेपूर्वी आणि घटनेनंतर काय घडले, याचा तपास पोलिसांकडून सुरू आहे. अटक झालेल्या आरोपींसह अन्य संशयितांची भूमिका तपासातून स्पष्ट होणार आहे.
लग्न, कुटुंब आणि भविष्याची स्वप्ने पाहणाऱ्या अवघ्या १८ वर्षीय तरुणाचा अशा प्रकारे मृत्यू झाल्याने परिसरात हळहळ व्यक्त होत आहे.
लग्नाच्या अवघ्या काही दिवस आधी काळाचा घाला; समीर पटेल होता आई-वडिलांचा एकुलता एक मुलगा!
मयत समीर पटेल हा कुटुंबातील एकुलता एक मुलगा होता. येत्या १० तारखेला त्याचे लग्न होणार होते. घरात लग्नाची तयारी सुरू होती. कुटुंबीय आनंदाच्या क्षणांची आतुरतेने वाट पाहत असतानाच आमिरच्या हत्येची बातमी धडकली. ज्या घरात लग्नाचा सनई-चौघडा वाजणार होता, त्याच घरावर आता दुःखाचा डोंगर कोसळला आहे. अवघ्या १८ वर्षांच्या आमिरचा असा दुर्दैवी अंत झाल्याने नातेवाईकांसह परिसरातून हळहळ व्यक्त होत आहे.
