तुळजापूर: जिथे लाखो भाविक श्रद्धेने नतमस्तक होतात, त्या श्री तुळजाभवानी मातेच्या मंदिरातच तंबाखूजन्य पदार्थांचे सेवन करून थुंकणाऱ्या आठ पुजाऱ्यांचे पितळ उघडे पडले आहे. मंदिर परिसरातील सीसीटीव्ही कॅमेऱ्यांनी हा संतापजनक प्रकार कैद केला असून, मंदिर संस्थानने या आठही जणांना थेट नोटीस बजावत कारवाईचा बडगा उगारला आहे. या घटनेमुळे संपूर्ण पुजारी वर्गात मोठी खळबळ उडाली आहे.
काय आहे प्रकरण?
श्री तुळजाभवानी मंदिर परिसरात, विशेषतः दर्शन मंडप, अभिषेक हॉल आणि पिण्याच्या पाण्याच्या ठिकाणी काही पुजारी तंबाखू, गुटखा यांसारखे पदार्थ खाऊन थुंकत असल्याच्या तक्रारी भाविकांकडून वाढल्या होत्या. पावित्र्य भंग करणाऱ्या या प्रकारांमुळे भाविकांमध्ये तीव्र नाराजी होती. या तक्रारींची दखल घेत मंदिर संस्थानने ७ जून रोजी एक जाहीर प्रगटन काढून मंदिर परिसरात थुंकणाऱ्यांवर थेट मंदिर बंदीची कारवाई करण्याचा सज्जड इशारा दिला होता.
केवळ इशाऱ्यावर न थांबता, मंदिर प्रशासनाने परिसरातील सीसीटीव्ही फुटेज तपासण्यास सुरुवात केली. या तपासणीत तब्बल आठ पुजारी तंबाखूजन्य पदार्थांचे सेवन करून थुंकताना रंगेहाथ पकडले गेले.
‘देऊळ कवायत’नुसार कारवाई
सीसीटीव्ही फुटेजचा भक्कम पुरावा हाती लागताच, मंदिर संस्थानने ‘देऊळ कवायत’ (मंदिर नियमावली) कलम २४ व २५ नुसार या आठही पुजाऱ्यांना कारणे दाखवा नोटीस बजावली आहे.
कारवाईच्या कचाट्यात सापडलेले पुजारी:
- वैभव विशाल भोसले
- विशाल दादासाहेब मगर
- लखन रोहिदास भोसले
- विशाल हन‍मंत चव्हाण
- विशाल बाळासाहेब गंगणे
- अक्षय किशोर कदम-भैरवदे
- राहुल हनुमंत पवार
- धीरज राजू चोपदार
तीन दिवसांची मुदत, अन्यथा तीन महिने बंदी!
नोटीस मिळालेल्या या पुजाऱ्यांना तीन दिवसांच्या आत आपला लेखी खुलासा सादर करण्याचे आदेश देण्यात आले आहेत. त्यांनी दिलेला खुलासा समाधानकारक न वाटल्यास किंवा खुलासा न दिल्यास, या सर्वांवर तीन महिन्यांसाठी मंदिर प्रवेश बंदीची कठोर कारवाई करण्यात येईल, असे नोटीसमध्ये स्पष्टपणे नमूद केले आहे.
तपासणी अचानक थांबली, कारण गुलदस्त्यात!
एकीकडे आठ जणांवर कारवाई करून मंदिर प्रशासनाने शिस्तीचा संदेश दिला असला, तरी दुसरीकडे मंदिरात सुरू असलेली तपासणीची प्रक्रिया अचानक थांबवण्यात आल्याने आश्चर्य व्यक्त होत आहे. ही तपासणी का आणि कोणाच्या दबावामुळे थांबली, याचे कारण मात्र गुलदस्त्यात आहे. त्यामुळे या कारवाईत आणखी काही ‘मोठे मासे’ वाचवण्याचा प्रयत्न होत आहे का, अशी चर्चा आता मंदिर परिसरात सुरू झाली आहे.
