उमरगा – डीएसके मोटर्स प्रा. लि. कंपनीच्या एनसीएलटी (NCLT) कोर्टातील प्रकरणांमध्ये वकील व एजंट असल्याचे सांगून स्वस्त दरात इनोव्हा गाड्या मिळवून देण्याचे आमिष दाखवत पुण्याच्या एका दाम्पत्याने उमरग्यातील नागरिकांची तब्बल ३२ लाख ३ हजार ६०१ रुपयांची आर्थिक फसवणूक केल्याचा प्रकार उघडकीस आला आहे. पैसे परत मागितल्यावर “मी वकील आहे हे लक्षात ठेव,” अशी धमकी दिल्याने याप्रकरणी उमरगा पोलीस ठाण्यात पती-पत्नीविरुद्ध फसवणुकीचा गुन्हा दाखल करण्यात आला आहे.
नेमकी घटना काय?
सुंदरवाडी, सध्या रा. डिग्गी रोड (उमरगा) येथील रहिवासी संतोष हरिश्चंद्र जाधव (वय ५२ वर्षे) व त्यांचे मित्र मधुकर चौधरी आणि अमोल मंजुळकर यांना पुण्याच्या दाम्पत्याने जाळ्यात ओढले.
पुण्यातील हिंगणे खुर्द येथील ऋषीकेश केशव करवंदे आणि चंद्रिका ऋषीकेश करवंदे या दोघांनी २७ मार्च २०२५ ते ५ जुलै २०२६ या कालावधीत संतोष जाधव यांचा विश्वास संपादन केला. “मी डीएसके मोटर्स प्रायव्हेट लिमिटेड कंपनीच्या एनसीएलटी केसेसमध्ये वकील व अधिकृत एजंट असून, कंपनीच्या जप्त केलेल्या इनोव्हा गाड्या तुम्हाला अत्यंत कमी किमतीत खरेदी करून देतो,” अशी खोटी बतावणी आरोपी ऋषीकेश करवंदे याने केली.
फोन पे आणि रोख स्वरूपात उकळले ३२ लाख
या आमिषाला बळी पडून संतोष जाधव, मधुकर चौधरी आणि अमोल मंजुळकर यांनी वेळोवेळी फोन पे (PhonePe) द्वारे तसेच रोख स्वरूपात अशी एकूण ३२ लाख ३ हजार ६०१ रुपयांची रक्कम आरोपींना दिली. मात्र, ठरल्याप्रमाणे इनोव्हा गाड्या न देता आरोपींनी केवळ टाळाटाळ केली.
पैसे परत मागितले असता आरोपीने “माझ्याविरुद्ध तक्रार केली तर मी वकील आहे हे माहीत असू द्या,” अशी थेट धमकी दिली. आपली फसवणूक झाल्याचे लक्षात येताच फिर्यादींनी पोलिसांत धाव घेतली.
पुण्याच्या दाम्पत्याविरुद्ध उमरगा पोलिसांत गुन्हा नोंद
संतोष जाधव यांनी १५ सप्टेंबर २०२६ रोजी उमरगा पोलीस ठाण्यात दिलेल्या प्रथम खबरेवरून पोलिसांनी खालील आरोपींविरुद्ध गुन्हा दाखल केला आहे:
-
आरोपी : ऋषीकेश केशव करवंदे व चंद्रिका ऋषीकेश करवंदे (दोघे रा. ९३१, एस.नं. २७, वक्रतुंड अपार्टमेंट, वासुदेव हरी, हिंगणे खुर्द, पुणे शहर).
-
दाखल कलमे : भारतीय न्याय संहिता (BNS) कलम ११६(२), ११६(५), ३१८(४) (फसवणूक), ३५१(५) (धमकावणे) आणि ३(५).
या कोट्यवधींच्या आर्थिक फसवणुकीच्या प्रकरणाचा पुढील तपास उमरगा पोलीस करत आहेत.
