उमरगा | उमरगा नगर परिषदेच्या कचरा वाहतूक वाहनाच्या कथित अनधिकृत वापराच्या प्रकरणाला आता नवे वळण मिळाले आहे. सामाजिक कार्यकर्ते तथा ॲड. शीतल चव्हाण यांनी सोशल मीडियाच्या माध्यमातून हा मुद्दा उपस्थित केल्यानंतर आणि धाराशिव लाईव्हने या प्रकरणाचा सातत्याने पाठपुरावा करत सविस्तर वृत्त प्रसिद्ध केल्यानंतर नगराध्यक्ष किरण गायकवाड यांनी मुख्याधिकारी यांच्याकडून संपूर्ण घटनेचा सविस्तर अहवाल मागविण्याचे निर्देश दिले आहेत.
नगर परिषदेचे कचरा वाहतूक करणारे अधिकृत वाहन शहराबाहेर आढळल्याची तसेच त्याचा वापर कथित चोरीच्या घटनेत झाल्याची माहिती समोर आल्यानंतर ॲड. शीतल चव्हाण यांनी या प्रकरणाकडे केवळ चोरीचा विषय म्हणून न पाहता, सार्वजनिक मालमत्तेच्या वापराबाबतचा गंभीर प्रश्न म्हणून लक्ष वेधले. शहरातील नागरिकांना नियमित कचरा संकलनाची सेवा मिळत नसताना नगर परिषदेचे अधिकृत वाहन शहराबाहेर कोणत्या कारणासाठी गेले, कोणाच्या आदेशाने गेले आणि त्याचा वापर नेमका कशासाठी करण्यात आला, याबाबत प्रशासनाने स्पष्टीकरण द्यावे, अशी त्यांनी मागणी केली.
या विषयाची धाराशिव लाईव्हनेही गांभीर्याने दखल घेत सविस्तर वृत्त प्रसिद्ध केले. त्यानंतर हे प्रकरण शहरभर चर्चेचा विषय ठरले आणि प्रशासनालाही त्याची गंभीर दखल घ्यावी लागली.
या घडामोडीनंतर नगराध्यक्ष किरण गायकवाड यांनी मुख्याधिकारी यांच्याकडून संपूर्ण घटनेचा सविस्तर अहवाल सादर करण्याचे निर्देश देणारे पत्र जारी केले आहे. त्यामुळे या प्रकरणाची अधिकृत चौकशी होऊन वस्तुस्थिती समोर येण्याची अपेक्षा व्यक्त केली जात आहे.
याबाबत प्रतिक्रिया देताना ॲड. शीतल चव्हाण म्हणाले, “सार्वजनिक मालमत्ता ही जनतेची असून तिच्या वापराबाबत पूर्ण पारदर्शकता असणे आवश्यक आहे. कोणतीही व्यक्ती, संस्था किंवा प्रशासन कायद्यापेक्षा मोठे नाही. नागरिकांनी तथ्यांच्या आधारे प्रश्न उपस्थित केले आणि निष्पक्ष पत्रकारितेने त्याला योग्य व्यासपीठ दिले, तर प्रशासनालाही उत्तरदायी व्हावे लागते.”
दरम्यान, या संपूर्ण प्रकरणात नागरिकांनी उपस्थित केलेले प्रश्न, ॲड. शीतल चव्हाण यांनी केलेला सातत्यपूर्ण पाठपुरावा आणि धाराशिव लाईव्हने केलेली निष्पक्ष पत्रकारिता यामुळे प्रशासनाला अधिकृत अहवाल मागवावा लागल्याची चर्चा शहरात सुरू आहे. निर्भीड नागरिक आणि जबाबदार पत्रकारिता यांच्या एकत्रित प्रयत्नांमुळे लोकशाही अधिक सक्षम होत असल्याची भावना नागरिकांकडून व्यक्त केली जात आहे.
