उमरगा: दुचाकीचे दुकान टाकण्यासाठी आणि स्वतःच्या डोक्यावरील कर्ज फेडण्यासाठी माहेरून दोन लाख रुपये आणण्याची मागणी करत, पतीनेच आपल्या २२ वर्षीय पत्नीचा गळा आवळून खून केल्याची खळबळजनक घटना उमरगा शहरातील डिग्गी रोड परिसरात घडली आहे. ही घटना १७ एप्रिल रोजी रात्री उघडकीस आली असून, याप्रकरणी आरोपी पतीवर उमरगा पोलिस ठाण्यात भारतीय न्याय संहितेअंतर्गत (BNS) खुनाचा गुन्हा दाखल करण्यात आला आहे.
पलक दत्ता कांबळे (वय २२) असे खून झालेल्या दुर्दैवी विवाहितेचे नाव आहे. तर, दत्ता शामराव कांबळे (वय २७) असे खून करणाऱ्या आरोपी पतीचे नाव आहे.
आरोपी दत्ता कांबळे हा मूळचा उजळंब (ता. बसवकल्याण, जि. बीदर, कर्नाटक) येथील रहिवासी आहे. सध्या तो पत्नी पलकसोबत उमरगा येथील डिग्गी रोडवर अनुसया व्यंकट सूर्यवंशी यांच्या घरी वास्तव्यास होता. आरोपी दत्ता याच्यावर काही कर्ज होते. हे कर्ज फेडण्यासाठी आणि दुचाकीचे (टू-व्हिलर) नवीन दुकान सुरू करण्यासाठी पैशांची गरज होती. यासाठी त्याने पत्नी पलककडे ‘तुझ्या आईकडून दोन लाख रुपये घेऊन ये’ अशी मागणी करत तगादा लावला होता.
पैसे आणण्यासाठी आरोपी दत्ता हा पलकला वारंवार शारीरिक आणि मानसिक त्रास देत होता. याच पैशांच्या मागणीवरून १७ एप्रिल रोजी रात्री ११:१९ वाजेच्या सुमारास त्यांच्यात वाद झाला. यावेळी संतापलेल्या दत्ताने कशाच्या तरी साहाय्याने पत्नी पलक हिचा निर्घृणपणे गळा आवळून तिचा खून केला.
या घटनेची माहिती मिळताच १८ एप्रिल रोजी दुपारी उपविभागीय पोलिस अधिकारी (SDPO), उमरगा पोलिस ठाण्याचे प्रभारी पोलिस निरीक्षक सूर्यवंशी आणि सहाय्यक पोलिस निरीक्षक कन्हेरे यांनी तत्काळ घटनास्थळी भेट देऊन पाहणी केली.
याप्रकरणी मयत पलक यांची आई केशर धनाजी शिंदे (वय ४३, रा. कुंभार पट्टी, उमरगा, जि. धाराशिव) यांनी शनिवारी (ता. १८) उमरगा पोलिस ठाण्यात धाव घेत फिर्याद दिली. या फिर्यादीवरून आरोपी दत्ता कांबळे याच्याविरुद्ध भारतीय न्याय संहिता (BNS) कलम १०३ (१), ८० आणि ८५ नुसार हुंडाबळी आणि खुनाचा गुन्हा दाखल करण्यात आला आहे.
पोलिस निरीक्षक सूर्यवंशी यांच्या आदेशावरून या गंभीर गुन्ह्याचा पुढील तपास सहाय्यक पोलिस निरीक्षक कन्हेरे हे करत आहेत. या घटनेमुळे उमरगा शहरात मोठी खळबळ उडाली असून, हळहळ व्यक्त केली जात आहे.
