वाशी – अल्पवयीन मुलीचा बळजबरीने बालविवाह लावून दिल्यानंतर तिच्यावर लैंगिक अत्याचार झाल्याची धक्कादायक घटना समोर आली आहे. याप्रकरणी पीडित मुलीने दिलेल्या फिर्यादीवरून वाशी पोलीस ठाण्यात संबंधित तरुणासह बालविवाहात सामील असलेल्यांवर बाल लैंगिक अत्याचार संरक्षण कायदा (POCSO) आणि बालविवाह प्रतिबंधक कायद्यान्वये गंभीर गुन्हा दाखल करण्यात आला आहे.
नेमकी घटना काय?
मिळालेल्या माहितीनुसार, १५ नोव्हेंबर २०२३ रोजी दुपारी १२.३० वाजेच्या सुमारास पीडित मुलगी अवघ्या १७ वर्षांची अल्पवयीन असताना संशयित आरोपींनी संगनमत करून तिचा विवाह एका गावातील तरुणाशी लावून दिला. बालविवाह झाल्यानंतर संबंधित तरुणाने तिच्यावर लैंगिक अत्याचार केला.
पॉक्सोसह विविध कलमान्वये गुन्हा दाखल
या छळाला कंटाळून अखेर पीडितेने १९ ऑगस्ट २०२६ रोजी वाशी पोलीस ठाण्यात जाऊन आपबिती कथन केली. तिच्या प्रथम खबरेवरून पोलिसांनी आरोपींविरुद्ध भारतीय न्याय संहिता (BNS) कलम ६४(२)(एम), ६५(१) सह बालविवाह प्रतिबंध अधिनियम २००६ चे कलम ९, १०, ११ आणि बालकांचे लैंगिक अपराधांपासून संरक्षण (POCSO Act) कलम ४, ६, ८, १२ अन्वये गुन्हा नोंदवला आहे. या प्रकरणाचा पुढील सखोल तपास वाशी पोलीस करत आहेत.
