वाशी : खडी मशीन सील केल्याचा राग मनात धरून आणि जुन्या भांडणाच्या कुरापतीतून एका ४४ वर्षीय व्यक्तीला लोखंडी रॉड आणि काठ्यांनी बेदम मारहाण करत जीवे मारण्याचा प्रयत्न केल्याची धक्कादायक घटना शुक्रवारी (ता. २४) रात्री घडली. ही घटना वाशी तालुक्यातील घाटनांदूर शिवार आणि ईट येथील लिमकर कॉम्प्लेक्ससमोर घडली. या प्रकरणी वाशी पोलीस ठाण्यात ११ नामनिर्देशित आणि ६ अज्ञात अशा एकूण १७ जणांवर भारतीय न्याय संहितेनुसार (BNS) खुनाच्या प्रयत्नासह दंगलीचा गुन्हा दाखल करण्यात आला आहे.
ज्ञानेश्वर सोपान गिते (वय ४४ वर्षे, रा. आंद्रूड, ता. भूम, जि. धाराशिव) असे या जीवघेण्या हल्ल्यात गंभीर जखमी झालेल्या फिर्यादीचे नाव आहे.
मिळालेल्या माहितीनुसार, आरोपी सुनील देशमुख याची खडी मशीन (स्टोन क्रशर) काही कारणास्तव सील करण्यात आली होती. याचा राग सुनील देशमुख आणि त्याच्या साथीदारांच्या मनात होता. याच रागातून आणि मागील भांडणाचे कारण पुढे करत आरोपींनी बेकायदेशीररित्या जमाव जमवला आणि फिर्यादी ज्ञानेश्वर गिते यांना लक्ष केले.
शुक्रवारी (ता. २४) रात्री ९ वाजेच्या सुमारास घाटनांदूर शिवार आणि ईट येथील लिमकर कॉम्प्लेक्ससमोर आरोपींनी ज्ञानेश्वर गिते यांना गाठले. त्यांना शिवीगाळ करत लाथाबुक्क्यांनी, तसेच लोखंडी रॉड आणि काठ्यांनी अमानुष मारहाण करण्यास सुरुवात केली. यावेळी त्यांना वाचवण्यासाठी आलेले परमेश्वर गिरी यांनाही आरोपींनी लोखंडी रॉड व काठीने मारहाण करून जखमी केले व जीवे मारण्याची धमकी दिली. या हल्ल्यात ज्ञानेश्वर गिते गंभीर जखमी झाले आहेत.
या आरोपींवर गुन्हा दाखल:
याप्रकरणी ज्ञानेश्वर गिते यांनी शनिवारी (ता. २५) वाशी पोलीस ठाण्यात फिर्याद दिली. यावरून पोलिसांनी खालील आरोपींवर गुन्हा दाखल केला आहे:
-
ईट (ता. भूम) येथील रहिवासी: सुनील पोपट देशमुख, सयाजी किसन हुंबे, निखिल मनोहर देशमुख, बाबा रमेश भोसले, अर्जुन किसन सुळ, राजाभाऊ शिवाजी देशमुख, रेवण ठोंबरे, अमर सुनील देशमुख, सचिन गुरव.
-
इतर गावांतील रहिवासी: प्रताप शिवाजी भोईटे (रा. लांजेश्वर, ता. भूम), रुपेश साळुंके (रा. पाथरुड, ता. भूम).
-
इतर: आणखी ६ अज्ञात इसम.
या सर्व आरोपींविरुद्ध वाशी पोलिसांनी भारतीय न्याय संहिता (BNS) कलम १०९(१), ११८(१), १९०, १८९(२), १९१(२), १९१(३), १२६(२) आणि ३५१(२), (३) अन्वये बेकायदेशीर जमाव जमवणे, दंगल करणे, गंभीर दुखापत करणे आणि खुनाचा प्रयत्न केल्याचा गुन्हा नोंदवला आहे. घटनेचे गांभीर्य पाहता पोलीस या प्रकरणाचा कसून तपास करत असून आरोपींचा शोध घेत आहेत.
