ढोकी: “तुझे अंघोळ करतानाचे छायाचित्रीकरण (व्हिडिओ) सोशल मीडियावर व्हायरल करून बदनाम करीन,” अशी भयंकर धमकी देऊन एका २८ वर्षीय विवाहितेवर उसाच्या शेतात बळजबरीने लैंगिक अत्याचार केल्याची अत्यंत धक्कादायक घटना ढोकी पोलीस ठाण्याच्या हद्दीत उघडकीस आली आहे. पीडितेने पोलिसांत जाण्याचा इशारा दिला असता आरोपीने तिला जातीवाचक शिवीगाळ करत जीवे मारण्याची धमकी दिली. याप्रकरणी ढोकी पोलीस ठाण्यात अत्याचार आणि ॲट्रॉसिटी कायद्यांतर्गत गुन्हा दाखल करण्यात आला आहे.
व्हिडिओच्या नावाखाली ब्लॅकमेल करून अत्याचार
पोलिसांकडून मिळालेल्या प्राथमिक माहितीनुसार, पीडित २८ वर्षीय महिला ढोकी पोलीस ठाण्याच्या हद्दीतील एका गावात राहते. ६ मार्च २०२६ रोजी रात्री ९:३० ते १०:०० वाजण्याच्या सुमारास गावातीलच एका नराधम तरुणाने पीडितेला गाठले. “माझ्याकडे तुझे अंघोळ करतानाचे व्हिडिओ आहेत, ते मी व्हायरल करीन,” अशी धमकी देऊन त्याने पीडितेवर मानसिक दबाव निर्माण केला. बदनामीच्या भीतीने महिला घाबरली असता, आरोपीने तिला जबरदस्तीने उसाच्या शेतात नेले आणि तिच्यावर लैंगिक अत्याचार केला.
तक्रार करणार म्हणताच जातीवाचक शिवीगाळ व धमकी
या घटनेनंतर पीडित महिलेने हिंमत दाखवून आरोपीला, “मला पुन्हा फोन करू नकोस, मी तुझ्याविरुद्ध पोलिसांत तक्रार करेन,” असे ठणकावून सांगितले. या गोष्टीचा राग आल्याने नराधम आरोपीने पीडितेला सार्वजनिक ठिकाणी अत्यंत हीन दर्जाची जातीवाचक शिवीगाळ केली आणि “जर पोलिसात गेलीस तर तुला जिवे ठार मारीन,” अशी थेट धमकी दिली.
ढोकी पोलिसांत गंभीर गुन्हे दाखल; आरोपीचा शोध सुरू
या सततच्या मानसिक आणि शारीरिक त्रासानंतर पीडित विवाहितेने २६ जून २०२६ रोजी ढोकी पोलीस ठाणे गाठून आरोपीविरुद्ध फिर्याद दिली. पीडितेच्या प्रथम खबरीवरून पोलिसांनी आरोपी तरुणाविरुद्ध भारतीय न्याय संहिता (BNS) कलम ६४ (बलात्कार), ३५१(२), ३५१(३) (जीवे मारण्याची धमकी) सह अनुसूचित जाती आणि अनुसूचित जमाती (अत्याचार प्रतिबंधक) कायदा (Atrocity Act) कलम ३(१)(आर), ३(१)(एस) आणि ३(२)(व्हि) अन्वये गुन्हा नोंदवला आहे.
(कायद्याच्या चौकटीनुसार आणि पीडितेच्या सुरक्षिततेसाठी तिचे नाव व गाव गोपनीय ठेवण्यात आले आहे).
या घटनेमुळे परिसरात तीव्र संताप व्यक्त केला जात असून, ढोकी पोलीस ठाण्याचे विशेष पथक फरार आरोपीच्या शोधासाठी रवाना झाले आहे. पुढील तपास वरिष्ठ पोलीस अधिकारी करत आहेत.
