ढोकी : तेर (ता. धाराशिव) येथील यात्रेमध्ये एका तरुणाला विनाकारण शिवीगाळ करत लाथाबुक्क्यांनी बेदम मारहाण केल्याची घटना रविवारी (दि. १९) रात्री साडेआठ वाजेच्या सुमारास घडली. भांडण सोडवण्यासाठी आलेल्या नातेवाईकांनाही यावेळी मारहाण करून जिवे मारण्याची धमकी देण्यात आली आहे. याप्रकरणी ढोकी पोलीस ठाण्यात ७ ओळखीच्या व इतर ३ अनोळखी अशा एकूण १० जणांवर गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, कावळेवाडी (ता. जि. धाराशिव) येथील ज्ञानेश्वर दगडू कोळी हे रविवारी तेर येथील यात्रेसाठी गेले होते. रात्री साडेआठच्या सुमारास ते यात्रेत असताना आरोपींनी गैरकायद्याची मंडळी जमवून ज्ञानेश्वर यांना विनाकारण शिवीगाळ करण्यास सुरुवात केली. त्यानंतर त्यांना लाथाबुक्क्यांनी मारहाण करून जखमी केले.
ज्ञानेश्वर यांना मारहाण होत असल्याचे पाहून त्यांचे नातेवाईक तातडीने भांडण सोडवण्यासाठी मध्यस्थी करण्यासाठी पुढे आले. मात्र, संतप्त आरोपींनी या नातेवाईकांनाही लाथाबुक्क्यांनी मारहाण करत जिवे ठार मारण्याची धमकी दिली.
यांच्यावर झाला गुन्हा दाखल:
याप्रकरणी ज्ञानेश्वर कोळी यांनी सोमवारी (दि. २०) दिलेल्या फिर्यादीवरून ढोकी पोलीस ठाण्यात खालील आरोपींवर गुन्हा नोंदवण्यात आला आहे:
-
शिवाजी रमेश देशमुख
-
देवा महादू आंधळे
-
गणेश शिवाजी चौघुले
-
अनिल गोविंद आंधळे
-
दिनेश इंगळे
-
हर्षल इंगळे
-
सुजित खांडेकर
-
इतर तीन अनोळखी इसम
ढोकी पोलिसांनी याप्रकरणी भारतीय न्याय संहिता (भा.न्या.सं.) कलम १८९(१), १८९(२), १९१(३), ११५(२), ३५२ आणि ३५१(२) अन्वये गुन्हा दाखल केला असून, या प्रकरणाचा पुढील तपास पोलीस करत आहेत. यात्रेसारख्या गर्दीच्या ठिकाणी घडलेल्या या हाणामारीच्या घटनेमुळे परिसरात काही काळ तणावाचे वातावरण निर्माण झाले होते.
