धाराशिव: तेलंगणा येथून शिर्डीला देवदर्शनासाठी कुटुंबीयांसोबत निघालेल्या एका महिलेचे सुमारे १ लाख २० हजार रुपये किमतीचे चार तोळ्यांचे सोन्याचे मंगळसूत्र धाराशिव तालुक्यातील येडशी टोलनाक्याजवळून अज्ञात चोरट्यांनी लंपास केले आहे. ही घटना गुरुवारी (दि. १० एप्रिल २०२५) घडली असून, याप्रकरणी धाराशिव ग्रामीण पोलीस ठाण्यात गुन्हा दाखल करण्यात आला आहे.
शांती श्रीनिवास सभावत (वय ४३ वर्षे, रा. राजेंद्र नगर, जि. रंगारेड्डी, तेलंगणा) यांनी याप्रकरणी फिर्याद दिली आहे. फिर्यादीनुसार, त्या आपल्या कुटुंबीयांसोबत कारने (क्र. टीएस ११ युसी ४२९७) तेलंगणा येथून शिर्डीला देवदर्शनासाठी जात होत्या. प्रवासादरम्यान त्या येडशी टोलनाक्याजवळ असलेल्या स्वच्छतागृहाजवळ थांबल्या होत्या.
याचवेळी, अज्ञात तीन इसमांनी संधी साधून त्यांच्या गळ्यातील अंदाजे १ लाख २० हजार रुपये किमतीचे चार तोळ्यांचे सोन्याचे मनी मंगळसूत्र चोरून नेले. हा प्रकार लक्षात आल्यानंतर शांती सभावत यांनी तात्काळ धाराशिव ग्रामीण पोलीस ठाण्यात धाव घेतली.
त्यांच्या फिर्यादीवरून पोलिसांनी अज्ञात तीन चोरट्यांविरुद्ध भारतीय न्याय संहितेच्या कलम ३०३(२) अन्वये गुन्हा नोंदवला आहे. पोलीस सीसीटीव्ही फुटेज आणि इतर तांत्रिक बाबींच्या आधारे आरोपींचा शोध घेत आहेत. देवदर्शनाला जाणाऱ्या भाविकांसोबत घडलेल्या या चोरीच्या घटनेमुळे परिसरात चिंता व्यक्त केली जात आहे.
