येरमाळा- येरमाळा येथील प्रसिद्ध येडेश्वरी देवी मंदिर परिसरात सुरू असलेल्या टायगर मटका जुगारावर येरमाळा पोलिसांनी गुरुवारी (दि. १० एप्रिल २०२५) सायंकाळी दोन ठिकाणी छापे टाकून कारवाई केली. या कारवाईत पोलिसांनी दोघांना अटक केली असून, त्यांच्याकडून रोख रक्कम आणि मटका जुगाराचे साहित्य जप्त केले आहे. याप्रकरणी दोघांविरुद्ध येरमाळा पोलीस ठाण्यात महाराष्ट्र जुगार प्रतिबंधक कायद्यान्वये स्वतंत्र गुन्हे दाखल करण्यात आले आहेत.
पोलिसांनी दिलेल्या माहितीनुसार, येडेश्वरी मंदिर परिसरात मटका जुगार खेळला जात असल्याची गुप्त माहिती येरमाळा पोलिसांना मिळाली होती. या माहितीच्या आधारे पोलिसांनी गुरुवारी सायंकाळी ६ वाजण्याच्या सुमारास मंदिर परिसरात छापा टाकला. यावेळी आश्रुबा अभिमान पवार (वय २६ वर्षे, रा. येरमाळा, ता. कळंब) हा टायगर मटका जुगाराचे साहित्य आणि रोख १,१२० रुपयांसह पोलिसांना मिळून आला. पोलिसांनी तात्काळ रक्कम व साहित्य जप्त करून त्याला ताब्यात घेतले.
त्यानंतर, सायंकाळी सुमारे ६ वाजून ५० मिनिटांनी पोलिसांनी मंदिर परिसरातच दुसऱ्या ठिकाणी छापा टाकला. यावेळी महेश उर्फ चिक्या मधुकर बारकुल (वय २७ वर्षे, रा. सरकारी दवाखान्याजवळ, येरमाळा, ता. कळंब) हा टायगर मटका जुगाराचे साहित्य आणि रोख १,४५० रुपयांसह पोलिसांच्या हाती लागला. त्याच्याकडील रक्कम व साहित्यही पोलिसांनी जप्त केले.
या दोन्ही प्रकरणी पोलिसांनी आरोपी आश्रुबा पवार आणि महेश उर्फ चिक्या बारकुल यांच्या विरोधात महाराष्ट्र जुगार प्रतिबंधक कायदा कलम १२(अ) अन्वये येरमाळा पोलीस ठाण्यात स्वतंत्र गुन्हे नोंदवले आहेत. मंदिर परिसरात सुरू असलेल्या या अवैध धंद्यांवर कारवाई केल्यामुळे समाधान व्यक्त होत असून, पोलीस पुढील तपास करत आहेत.
तुळजाभवानी मंदिर परिसरात मटका अड्ड्यावर छापा; एकास अटक, मुद्देमाल जप्त
तुळजापूर येथील श्री तुळजाभवानी मंदिराजवळील शासकीय इमारतीच्या बाजूला सुरू असलेल्या कल्याण मटका जुगार अड्ड्यावर तुळजापूर पोलिसांनी गुरुवारी (दि. १० एप्रिल २०२५) सायंकाळी छापा टाकला. या कारवाईत पोलिसांनी एका व्यक्तीला अटक केली असून, त्याच्याकडून रोख रक्कम आणि मटका जुगाराचे साहित्य जप्त केले आहे.सलमान खय्युम शेख (वय २५ वर्षे, रा. वासुदेव गल्ली, ता. तुळजापूर) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, तुळजाभवानी मंदिर परिसरात शासकीय इमारतीच्या बाजूला कल्याण मटका जुगार खेळला जात असल्याची गुप्त माहिती पोलिसांना मिळाली होती. या माहितीच्या आधारे, तुळजापूर पोलिसांनी गुरुवारी सायंकाळी ७ वाजून ५ मिनिटांच्या सुमारास सदर ठिकाणी छापा टाकला.
यावेळी आरोपी सलमान शेख हा कल्याण मटका जुगाराचे आकडे घेताना आणि जुगाराचे साहित्य स्वतःच्या ताब्यात बाळगताना रंगेहाथ आढळला. पोलिसांनी त्याच्याकडून रोख रक्कम १,२५० रुपये आणि मटका जुगाराचे साहित्य जप्त केले.
याप्रकरणी पोलिसांनी आरोपी सलमान शेख याच्या विरोधात तुळजापूर पोलीस ठाण्यात महाराष्ट्र जुगार प्रतिबंधक कायदा कलम १२(अ) अन्वये गुन्हा नोंदवला आहे. तीर्थक्षेत्र असलेल्या तुळजापूर शहरात, विशेषतः मंदिर परिसरात चालणाऱ्या अशा अवैध धंद्यांवर कडक कारवाई सुरू ठेवणार असल्याचे पोलिसांनी सांगितले.
