धाराशिव: आपल्या भावजय व मुलींना शिवीगाळ का केली, याचा जाब विचारल्याच्या कारणावरून एका व्यक्तीने दाम्पत्याला शिवीगाळ करत लाथाबुक्क्यांनी व लोखंडी रॉडने मारहाण करून जखमी केले, तसेच जीवे मारण्याची धमकी दिल्याची घटना धाराशिव तालुक्यातील जहागीरदारवाडी मधला तांडा येथे घडली आहे. याप्रकरणी धाराशिव ग्रामीण पोलीस ठाण्यात एका व्यक्तीविरुद्ध गुन्हा दाखल करण्यात आला आहे.
फिर्यादी बाबु सुभाष राठोड (वय ३९ वर्षे, रा. जहागीरदारवाडी मधला तांडा, ता. जि. धाराशिव) यांनी दिलेल्या तक्रारीनुसार, ही घटना २६ मे २०२५ रोजी सायंकाळी साडेचार वाजण्याच्या सुमारास जहागीरदारवाडी मधला तांडा येथील जिल्हा परिषद शाळेसमोर घडली. आरोपी संजय गोपीनाथ राठोड (रा. जहागीरदारवाडी मधला तांडा) याने फिर्यादी बाबु राठोड यांची भावजय व मुलींना शिवीगाळ केली होती.
याबाबत बाबु राठोड यांनी आरोपी संजय राठोड यास जाब विचारला असता, त्याचा राग मनात धरून संजय राठोड याने फिर्यादी बाबु राठोड व त्यांची पत्नी अनिता यांना शिवीगाळ करत लाथाबुक्क्यांनी व लोखंडी रॉडने मारहाण केली. यामध्ये ते जखमी झाले. तसेच, आरोपीने त्यांना जीवे ठार मारण्याची धमकीही दिली.
घटनेनंतर बाबु राठोड यांनी २६ मे २०२५ रोजी धाराशिव ग्रामीण पोलीस ठाण्यात फिर्याद दिली. त्यांच्या तक्रारीवरून पोलिसांनी आरोपी संजय गोपीनाथ राठोड याच्याविरुद्ध भारतीय न्याय संहिता (भा.न्या.सं.) कलम ११८(१) (दुखापत करणे), ११५(२) (गंभीर दुखापत करणे), ३५२, ३५१(२), ३५१(३) अन्वये गुन्हा नोंदवला आहे. पोलीस पुढील तपास करत आहेत.
