धाराशिव: शहरात एक धक्कादायक घटना घडली आहे. केवळ स्कुटी परत करण्याच्या क्षुल्लक कारणावरून एका ३१ वर्षीय तरुणाला तिघांनी मिळून शिवीगाळ करत लाथाबुक्क्यांनी आणि चाकूने मारहाण केल्याची घटना समोर आली आहे. ही घटना १२ जून २०२५ रोजी सायंकाळी साडेपाच वाजण्याच्या सुमारास के.के. हॉस्पिटलसमोर घडली. याप्रकरणी धाराशिव शहर पोलीस ठाण्यात तिघांविरोधात गुन्हा दाखल करण्यात आला आहे.
आकाश रमेश पवार (वय ३१, रा. गणेश नगर, धाराशिव) असे जखमी झालेल्या तरुणाचे नाव आहे. त्यांनी दिलेल्या फिर्यादीनुसार, विनायक साळुंके, आदर्श चौधरी आणि उत्कर्ष यादव (सर्व रा. गणेश नगर, धाराशिव) या तिघांनी मिळून त्यांना मारहाण केली. “मी तुला दिलेली स्कुटी परत कर” या कारणावरून आरोपींनी आकाश पवार यांना शिवीगाळ करण्यास सुरुवात केली. वादाचे रूपांतर हाणामारीत झाले आणि आरोपींनी त्यांना लाथाबुक्क्यांनी मारहाण केली. इतकेच नाही तर, त्यांनी चाकूने हल्ला करून पवार यांना जखमी केले आणि जीवे मारण्याची धमकीही दिली.
या घटनेनंतर आकाश पवार यांनी १३ जून २०२५ रोजी धाराशिव शहर पोलीस ठाण्यात फिर्याद दिली. त्यांच्या तक्रारीवरून पोलिसांनी आरोपी विनायक साळुंके, आदर्श चौधरी आणि उत्कर्ष यादव यांच्या विरोधात भारतीय न्याय संहिता कलम ११८(१), ११५(२), ३५२, ३५१(२) आणि ३(५) अन्वये गुन्हा नोंदवला आहे. पोलीस या प्रकरणाचा अधिक तपास करत आहेत.
