आंबी : परंडा तालुक्यातील एक अत्यंत धक्कादायक आणि माणुसकीला काळिमा फासणारी घटना समोर आली आहे. एका ५५ वर्षीय महिलेवर गावातीलच चार तरुणांनी घरात घुसून सामूहिक लैंगिक अत्याचार केल्याचा संतापजनक प्रकार घडला आहे. आरोपींनी पीडितेला जातीवाचक शिवीगाळ करत लाथाबुक्क्यांनी आणि काठीने बेदम मारहाण केली. इतकेच नाही, तर तिच्या तोंडात मिरची पावडर भरून तोंडावर थुंकण्याचे अमानुष कृत्यही केले.
ही घटना शुक्रवारी, १३ जून २०२५ रोजी पहाटे अडीच वाजण्याच्या सुमारास घडली. पीडित महिला घरात एकटीच असताना आरोपींनी घरात प्रवेश केला. त्यांनी सुरुवातीला जातीवाचक शिवीगाळ करण्यास सुरुवात केली आणि त्यानंतर पीडितेला काठीने व लाथाबुक्क्यांनी मारहाण केली. यानंतर या नराधमांनी तिच्यावर लैंगिक अत्याचार केला.
या भयंकर प्रकारानंतर पीडित महिलेने धाडस दाखवत त्याच दिवशी आंबी पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी गावातीलच चार तरुणांविरोधात गुन्हा नोंदवला आहे. पीडितेची ओळख गोपनीय ठेवण्यात आली आहे.
आंबी पोलिसांनी आरोपींविरोधात भारतीय न्याय संहिता (भा.न्या.सं.) कलम ६४(१), ७४, ३३३, ११५(२), ३५२, ३५१(२), ३५१(३), ३(५) यांसारख्या गंभीर कलमांखाली, तसेच अनुसूचित जाती-जमाती अत्याचार प्रतिबंधक कायद्याच्या (अॅट्रॉसिटी अॅक्ट) विविध कलमांनुसार गुन्हा दाखल केला आहे. पोलीस या प्रकरणाचा अधिक तपास करत असून आरोपींचा शोध सुरू आहे. या घटनेमुळे परिसरात तीव्र संतापाची लाट उसळली आहे.
