शिराढोण : कळंब तालुक्यातील एका गावात एका २१ वर्षीय तरुणीवर लैंगिक अत्याचार झाल्याची धक्कादायक घटना उघडकीस आली आहे. पीडितेच्या आई-वडिलांना आणि भावाला जीवे मारण्याची धमकी देऊन गावातीलच एका तरुणाने तिच्यावर वारंवार लैंगिक अत्याचार केले. या अत्याचारातून पीडिता गर्भवती राहून तिने एका बाळाला जन्म दिला आहे. याप्रकरणी शिराढोण पोलिसांनी २९ जून २०२५ रोजी गुन्हा दाखल केला आहे.
पोलिसांनी दिलेल्या माहितीनुसार, ही घटना जुलै २०२४ ते डिसेंबर २०२४ या कालावधीत घडली. पीडित तरुणी घरी एकटी असताना आरोपी तरुणाने तिला जीवे मारण्याची धमकी देऊन तिच्या असहाय्यतेचा फायदा घेतला आणि तिच्यावर अनेक वेळा लैंगिक अत्याचार केले. या अत्याचाराच्या सत्रामुळे पीडिता गरोदर राहिली आणि नुकतीच तिची प्रसूती झाली आहे.
घडलेल्या प्रकारानंतर पीडितेने हिंमत दाखवून पोलिसांना वैद्यकीय जबाब दिला. तिच्या जबाबावरून शिराढोण पोलीस ठाण्यात आरोपी तरुणाविरोधात भारतीय न्याय संहिता कलम ६४, ६४(२)(एफ)(एम), आणि ३५१(२)(३) अन्वये गुन्हा नोंदवण्यात आला आहे. पोलीस या प्रकरणाचा अधिक तपास करत असून आरोपीचा शोध सुरू आहे. या घटनेमुळे परिसरात एकच खळबळ उडाली असून नागरिकांमध्ये संतापाचे वातावरण आहे.
