उमरगा : तालुक्यातील कदेर येथील शेत शिवारात जुन्या भांडणाचा राग मनात धरून एका व्यक्तीला बेकायदेशीरपणे जमाव जमवून काठीने आणि लाथाबुक्क्यांनी मारहाण केल्याची घटना घडली आहे. ही घटना २८ जून रोजी सायंकाळी साडेपाच वाजण्याच्या सुमारास घडली असून, याप्रकरणी उमरगा पोलीस ठाण्यात पाच जणांविरुद्ध गुन्हा दाखल करण्यात आला आहे.
याबाबत परमेश्वर लक्ष्मण चौधरी (वय ४२, रा. कदेर) यांनी २९ जून रोजी फिर्याद दिली आहे. फिर्यादीनुसार, त्यांचे भाऊ भिमाशंकर चौधरी यांना कदेर येथील शेत गट क्रमांक ३९ मध्ये आरोपींनी अडवले. मागील भांडणाच्या कारणावरून आरोपी सतीश लक्ष्मण बनसोडे, अरुण तात्याराव बनसोडे, सुनील लिंबाजी जिवनगे, मनोज दिगंबर भाले, आणि अनिल तम्मा बनसोडे (सर्व रा. कदेर) यांनी एकत्र येऊन भिमाशंकर यांना शिवीगाळ केली. त्यानंतर त्यांना काठीने आणि लाथाबुक्क्यांनी मारहाण करून जखमी केले.
परमेश्वर चौधरी यांनी दिलेल्या फिर्यादीवरून उमरगा पोलिसांनी पाचही आरोपींविरुद्ध भारतीय न्याय संहिता कलम ११८(१), ११५(२), ३५२, १८९(२), १९१(२)(३), आणि १९० अन्वये गुन्हा नोंदवला आहे. पोलीस या घटनेचा अधिक तपास करत आहेत.
