धाराशिव – वाशी तालुक्यातील पिंपळगाव (क.) येथील वादग्रस्त ठरलेल्या ‘तुळजाई लोकनाट्य कला केंद्रा’चे सर्व परवाने जिल्हादंडाधिकारी कीर्ती किरण पुजार यांनी एका आदेशान्वये कायमस्वरूपी रद्द केले आहेत. कला केंद्राच्या ठिकाणी गंभीर स्वरूपाचे गुन्हे घडणे, परवान्यातील अटी व शर्तींचे उल्लंघन आणि कायदा व सुव्यवस्थेचा निर्माण झालेला प्रश्न या कारणास्तव हा कठोर निर्णय घेण्यात आला. बीड जिल्ह्यातील माजी उपसरपंच गोविंद बर्गे यांच्या आत्महत्येमुळे आणि यातील आरोपी नर्तिका पूजा गायकवाड हिच्यामुळे हे कलाकेंद्र चर्चेत आले होते.
या कला केंद्राच्या चालक श्रीमती विजया हिरामण अंधारे यांनी, वाशी तहसीलदारांनी १७ जून २०२५ रोजी परवाने निलंबित करण्याच्या आदेशाविरोधात जिल्हादंडाधिकाऱ्यांकडे पुनर्विचार याचिका सादर केली होती. अनेक कलाकारांच्या उदरनिर्वाहाचे कारण देत त्यांनी निलंबनाचा आदेश रद्द करण्याची विनंती केली होती. जिल्हाधिकारी कार्यालयाने यावर तात्पुरती स्थगिती देत सखोल चौकशीचे आदेश दिले होते.
पोलीस अहवालातून धक्कादायक बाबी उघड
वाशी पोलीस निरीक्षकांनी १५ सप्टेंबर २०२५ रोजी सादर केलेल्या अहवालात कला केंद्रावर गंभीर गुन्हे दाखल असल्याची माहिती देण्यात आली. या अहवालानुसार:
- जानेवारी २०२५ पासून कला केंद्रावर महाराष्ट्र पोलीस अधिनियम आणि महाराष्ट्र दारूबंदी अधिनियमांतर्गत गुन्हे दाखल आहेत.
- मे २०२५ मध्ये भारतीय न्याय संहितेच्या विविध कलमांनुसार दोन गंभीर गुन्हे दाखल झाले, ज्यातील एक गुन्हा महिलांच्या छेडछाडीशी संबंधित आहे.
- येथील एक कलाकार दुसऱ्या एका गुन्ह्यात प्रमुख आरोपी असल्याचेही निष्पन्न झाले.
स्थानिक पातळीवरूनही तीव्र विरोध
या कला केंद्रामुळे गावातील तरुण पिढी बिघडत चालल्याचा आरोप करत स्थानिक महिलांनी जिल्हाधिकारी कार्यालयावर मोर्चा काढण्याचा इशारा दिला होता. तसेच, विधानसभा सदस्य विजय वडेट्टीवार आणि रिपब्लिकन पार्टी ऑफ इंडिया (आठवले) युवक आघाडी यांनीही वाढत्या गुन्हेगारीमुळे हे कला केंद्र बंद करण्याची मागणी केली होती.
तहसीलदारांच्या पाहणीतही आढळल्या त्रुटी
तहसीलदारांनी २६ ऑगस्ट २०२५ रोजी केलेल्या स्थळपाहणीमध्ये कला केंद्रात ४४ महिला कलाकार आणि १२ पुरुष कर्मचारी आढळून आले. परिसरात १३ सीसीटीव्ही कॅमेरे कार्यरत होते, मात्र परवान्याची प्रत दर्शनी भागात लावलेली नव्हती. तसेच, मंजूर रेखांकनापेक्षा तीन अतिरिक्त पत्र्याचे शेड अनधिकृतपणे उभारल्याचे दिसून आले, ज्यात कार्यक्रमासाठी आणि महिलांच्या निवासाची सोय केली होती.
अंतिम आदेश
पोलीस आणि तहसीलदारांच्या अहवालांचे अवलोकन केल्यानंतर, अर्जदार श्रीमती विजया अंधारे यांनी परवानगी घेताना दिलेल्या हमीपत्राचा आणि परवान्यातील नियमांचा भंग केल्याचे स्पष्ट झाले. कायदा व सुव्यवस्थेची गंभीर परिस्थिती पाहता जिल्हादंडाधिकाऱ्यांनी खालील आदेश पारित केले:
- श्रीमती विजया अंधारे यांचा पुनर्विचार अर्ज नामंजूर करण्यात आला.
- कला केंद्राच्या उभारणीसाठी दिलेले मूळ ना-हरकत प्रमाणपत्र (दि. २३.०६.२०२२) कायमस्वरूपी रद्द करण्यात आले.
- तहसीलदारांनी निलंबित केलेले जागेची अनुज्ञप्ती, कार्यक्रमाची अनुज्ञप्ती आणि तिकीट विक्रीची अनुज्ञप्ती हे तिन्ही परवाने कायमस्वरूपी रद्द करण्यात आले.
या आदेशाची प्रत पुढील कार्यवाहीसाठी पोलीस अधीक्षक, उपविभागीय अधिकारी आणि तहसीलदारांसह संबंधित सर्व विभागांना पाठवण्यात आली आहे.
