लोहारा: “मुलाला आमच्यासोबत पाठव, नाहीतर तुला जिवे मारून टाकू,” अशी धमकी देत वडिलांच्या डोळ्यादेखत १३ वर्षीय मुलाचे अपहरण केल्याची धक्कादायक घटना लोहारा तालुक्यातील करजगाव शिवारात घडली आहे. याप्रकरणी बीड जिल्ह्यातील एकाच कुटुंबातील तिघांसह चौघांवर लोहारा पोलीस ठाण्यात अपहरणाचा गुन्हा दाखल करण्यात आला आहे.
पोलिसांनी दिलेल्या माहितीनुसार, या घटनेतील फिर्यादी बाळू वसंत भोजराव (वय ५२, रा. हिप्परगा सय्यद, ता. लोहारा) यांचा मुलगा सागर बाळू भोजराव (वय १३) याचे अपहरण करण्यात आले आहे. ही घटना ३ ऑक्टोबर २०२५ रोजी सकाळी ११:३० च्या सुमारास करजगाव शिवारातील नागु पवार यांच्या शेतातील गोठ्यात घडली.
आरोपी नवनाथ कदम, शुभम नवनाथ कदम, सुमित्रा नवनाथ कदम (सर्व रा. सिरसदेवी, ता. गेवराई, जि. बीड) आणि अभिषेक अशोक म्हस्के (रा. राक्षसभुवन, जि. बीड) हे चौघे फिर्यादीच्या गोठ्यावर आले. त्यांनी फिर्यादी बाळू भोजराव यांना धमकावत, “तुमच्या मुलाला आमच्यासोबत पाठवा, अन्यथा तुम्हाला जिवे ठार मारू,” अशी धमकी दिली. त्यानंतर आरोपींनी अल्पवयीन सागरला बळजबरीने गाडीत बसवून पळवून नेले.
या घटनेनंतर तब्बल दीड महिन्यांनी, म्हणजेच २७ नोव्हेंबर २०२५ रोजी बाळू भोजराव यांनी लोहारा पोलीस ठाण्यात फिर्याद दिली आहे. त्यांच्या फिर्यादीवरून वरील चारही आरोपींविरुद्ध भारतीय न्याय संहिता (BNS) कलम १३४ (२), ११५ (२), ३५२, ३५१ (२)(३) आणि ३ (५) अन्वये गुन्हा दाखल करण्यात आला आहे. पुढील तपास लोहारा पोलीस करत आहेत.
