धाराशिव: वाशी पोलीस ठाण्याच्या हद्दीतून चोरीला गेलेल्या म्हशींचा शोध घेण्यात स्थानिक गुन्हे शाखेला (LCB) मोठे यश आले आहे. याप्रकरणी पोलिसांनी सातारा आणि पुणे जिल्ह्यातील तिघांना अटक केली असून, त्यांच्याकडून चोरीच्या तीन म्हशी आणि पिकअप वाहन असा एकूण ७ लाख ३० हजार रुपयांचा मुद्देमाल जप्त केला आहे. हे चोरटे आजच या म्हशी बारामती बाजारात विकण्याच्या तयारीत होते, त्यापूर्वीच पोलिसांनी त्यांच्या मुसक्या आवळल्या.
पोलीस अधीक्षक रितु खोखर यांच्या मार्गदर्शनाखाली स्थानिक गुन्हे शाखेचे निरीक्षक विनोद इज्जपवार यांचे पथक जिल्ह्यातील चोरीच्या गुन्ह्यांचा तपास करत होते. पेट्रोलिंग दरम्यान तांत्रिक विश्लेषण आणि गुप्त बातमीदारामार्फत मिळालेल्या माहितीवरून वाशी पोलीस ठाण्यातील (गुन्हा र.नं. ३९०/२०२५, कलम ३०३(२) बीएनएस) गुन्ह्यातील संशयित निष्पन्न झाले.
तपासाची चक्रे फिरवत पथकाने मुख्य आरोपी रविंद्र उर्फ बुठा ठकसेन रायते (वय ३३, रा. कणसे वस्ती, गुणवरे, ता. फलटण, जि. सातारा) याला ताब्यात घेतले. सुरुवातीला त्याने उडवाउडवीची उत्तरे दिली, मात्र पोलिसी खाक्या दाखवताच त्याने गुन्ह्याची कबुली दिली. त्याने त्याचे साथीदार ऋषीकेश बिंटु जगताप (रा. गोखली, ता. फलटण) आणि राहुल सुभाष सपकाळ (रा. सोनगाव, ता. बारामती, जि. पुणे) यांच्या मदतीने ही चोरी केल्याचे सांगितले. या माहितीवरून पोलिसांनी इतर दोन आरोपींनाही ताब्यात घेतले.
आरोपींकडे चोरीच्या म्हशींबाबत चौकशी केली असता, त्यांनी सांगितले की, “म्हशी रविंद्र रायते याच्या घरासमोरील झाडीमध्ये बांधून ठेवल्या असून, आज त्या बारामती येथील बाजारात विक्रीसाठी घेऊन जाणार आहोत.” पोलिसांनी तातडीने गुणवरे (ता. फलटण) येथे जाऊन छापा टाकला. तेथून चोरीस गेलेल्या ३ म्हशी आणि गुन्ह्यात वापरलेले पिकअप वाहन असा एकूण ७ लाख ३० हजार रुपयांचा मुद्देमाल जप्त करण्यात आला.
ही कामगिरी पोलीस अधीक्षक रितु खोखर यांच्या मार्गदर्शनाखाली पो.नि. विनोद इज्जपवार, स.पो.नि. सचिन खटके, पोलीस अंमलदार विनोद जानराव, नितीन जाधवर, बबन जाधवर आणि चालक प्रशांत किवंडे यांच्या पथकाने केली.
