“धनुष्यबाण शिंदेंचा, पण प्रत्यंचा ताणली राणादादांनी!” धाराशिवमध्ये शिवसैनिकांचा ‘ऑडिओ बॉम्ब’

धाराशिव: नगरपरिषदेच्या विजयाचा गुलाल अजून हवेत विरला नाही, तोच धाराशिवमध्ये महायुतीच्या (विशेषतः शिंदे गटाच्या) तंबूत असा काही ‘बॉम्ब’ फुटलाय की, त्याची धमक थेट मुंबईपर्यंत पोहोचली आहे. “तिकीट माझे, माणूस तुझा आणि गेम मात्र राणादादांचा” असा काहीसा प्रकार सध्या धाराशिवमध्ये सुरू असून, जिल्हा परिषदेच्या तिकीट वाटपावरून शिवसैनिकांचा संयम सुटला आहे.

🎧 व्हायरल ऑडिओ क्लिप: संताप, अश्रू आणि गौप्यस्फोट!

सध्या समाज माध्यमांवर एक ऑडिओ क्लिप वाऱ्याच्या वेगाने फिरतेय. यात शिवसेना पदाधिकारी अविनाश खापे आणि जिल्हा संपर्कप्रमुख राजन साळवी यांच्यात झालेला संवाद म्हणजे शिवसैनिकांच्या मनातील खदखदत्या लाव्हा रसाचा उद्रेक आहे.

या संवादातून बाहेर आलेला सर्वात धक्कादायक आरोप म्हणजे— “शिवसेनेच्या उमेदवारांचे ‘एबी फॉर्म’ (AB Form) चक्क भाजप आमदार राणाजगजितसिंह पाटील आणि त्यांचे चिरंजीव मल्हार पाटील यांच्या शुभहस्ते वाटले गेले!”

दिवसभर बैठका शिवसैनिकांसोबत करायच्या आणि रात्री गुपचूप भाजपच्या बंगल्यावर जाऊन फॉर्म वाटायचे, या प्रकारामुळे शिवसैनिक अक्षरशः रडकुंडीला आले आहेत. “शिवसैनिक म्हणून ओळख सांगायला लाज वाटते,” हे एका पदाधिकाऱ्याचे वाक्य सध्याच्या परिस्थितीची भीषणता सांगायला पुरेसे आहे.

🤝 ऑपरेशन ‘खिसा’: उजव्या खिशात शिंदे, डाव्या खिशात दादा!

चालू राजकीय घडामोडींवर नजर टाकली तर हे चित्र स्पष्ट होतं की, भाजप आमदार राणाजगजितसिंह पाटील यांनी ‘ऑपरेशन खिसा’ राबवलंय.

• शिंदे गट: जागा शिंदेंच्या, पण उमेदवार भाजपचे.

• अजित पवार गट: जागा दादांच्या, पण उमेदवार राणांचे समर्थक.

  थोडक्यात काय, तर महायुतीचं नाव पुढं करून भाजप नेत्यांनी आपलेच ‘मोहरे’ वेगवेगळ्या चिन्हांवर रिंगणात उतरवले आहेत.

📦 ‘पार्सल’ उमेदवारांचा सुळसुळाट आणि निष्ठावंतांचा ‘गेम’

या संतापामागे फक्त ऑडिओ क्लिप नाही, तर उमेदवारी वाटपाचा ‘इतिहास’  आहे. शिवसैनिकांचा आरोप आहे की, पक्षाने निष्ठावंतांना डावलून भाजपच्या ‘आयात’ उमेदवारांना डोक्यावर बसवलं आहे. पुरावा पाहिजे? हे पहा:

१. पळसप गट: इथे शिंदे गटाचे निष्ठावंत अजित लाकाळ ‘स्टँडबाय’ मोडवर आणि तिकीट मिळालं भाजपच्या नेताजी बोंदर-पाटील यांना (ज्यांचं तिथे मतदानही नाही!).

२. डिकसळ गट: निष्ठावंत महिला कार्यकर्त्या लता रणदिवे यांचा पत्ता कट करून भाजप कार्यकर्ते तुषार शिंदे यांच्या पत्नी पूजा शिंदे यांना उमेदवारी.

३. जागजी आणि येडशी: इथेही भाजप मूळ असलेल्या पांडुरंग सावंत आणि संतोष सस्ते यांनाच शिवसेनेची उमेदवारी.

थोडक्यात, “बाहेरून आलेल्यांना ए-फॉर्म आणि निष्ठावंतांना फक्त बी-फॉर्मचा झुनझुना” हेच धोरण राबवल्याने शिवसैनिक पेटून उठले आहेत.

🔥 “आम्ही तानाजी सावंतांची माणसं नाही, पण…”

सर्वात महत्त्वाची राजकीय ट्विस्ट म्हणजे, व्हायरल क्लिपमध्ये कार्यकर्त्यांनी तानाजी सावंत यांचं नाव घेतलं आहे. “आम्ही शिंदे साहेबांचे कार्यकर्ते आहोत, तानाजी सावंतांचे नाही. पण आता धाराशिवमध्ये सेनेला वाचवायचं असेल, तर सूत्रं तानाजीरावांच्या हातीच द्या,” अशी मागणी कार्यकर्त्यांनी केली आहे. म्हणजेच, राणा पाटलांच्या वर्चस्वाला शह देण्यासाठी आता शिवसैनिक जुन्या प्रतिस्पर्ध्यालाही साद घालायला तयार आहेत.

🛑 अंतिम इशारा: बंडखोरी की घरवापसी?

“राणा पाटलांनी शिवसेनेचा ‘गेम’ केलाय हे जाहीर करा आणि आम्हाला अपक्ष लढू द्या, नाहीतर राजकारण सोडून घरी बसू,” असा सज्जड दम शिवसैनिकांनी दिला आहे.

धाराशिवच्या कुरुक्षेत्रावर सध्या भाजपचं ‘कमळ’ जोरात आहे, पण ते फुलवण्यासाठी ‘धनुष्यबाण’ आणि ‘घड्याळ’ वापरलं जातंय, हे आता लपून राहिलेलं नाही. २७ जानेवारीपर्यंत माघार घेतली नाही, तर धाराशिवमध्ये “मैत्रीपूर्ण लढती” ऐवजी “शत्रुत्वपूर्ण बंडखोरी” पाहायला मिळण्याची दाट शक्यता आहे.

बाळासाहेबांची शिवसेना भाजपच्या दावणीला बांधली गेली का? हा प्रश्न आता प्रत्येक निष्ठावंत शिवसैनिकाला छळतोय.

– बोरूबहाद्दर