नळदुर्ग: तुळजापूर तालुक्यातील कार्ला शिवारात जमिनीच्या वादातून एका ३६ वर्षीय तरुणाला लाथाबुक्क्यांनी बेदम मारहाण करून जखमी केल्याची घटना उघडकीस आली आहे. यावेळी आरोपींनी शेतातील शेडचे कुलूप आणि गेट तोडून नुकसान करत तरुणाला जीवे मारण्याची धमकी दिली. या प्रकरणी नळदुर्ग पोलीस ठाण्यात एकाच कुटुंबातील ८ जणांवर गुन्हा दाखल करण्यात आला आहे.
पोलिसांकडून मिळालेल्या माहितीनुसार, ज्ञानेश्वर श्रीकांत श्रीनामे (वय ३६ वर्षे, रा. कार्ला, ता. तुळजापूर) असे मारहाण झालेल्या फिर्यादीचे नाव आहे. कार्ला शिवारातील शेत गट नं. १३७ येथे १४ फेब्रुवारी रोजी दुपारी दीड वाजेच्या सुमारास हा प्रकार घडला. जमिनीच्या जुन्या वादाच्या कारणावरून आरोपींनी ज्ञानेश्वर यांना गाठून शिवीगाळ केली. त्यानंतर त्यांना लाथाबुक्क्यांनी मारहाण करून जखमी केले. तसेच, त्यांच्या शेतातील शेडचे लोखंडी गेट आणि कुलूप तोडून सुमारे तीन हजार रुपयांचे नुकसान केले आणि त्यांना जीवे ठार मारण्याची धमकी दिली.
या प्रकरणी ज्ञानेश्वर श्रीनामे यांनी २० फेब्रुवारी रोजी नळदुर्ग पोलिसांत धाव घेत तक्रार दिली. त्यांच्या प्रथम खबरेवरून खालील ८ जणांवर गुन्हा नोंदवण्यात आला आहे:
१. नवनाथ गेमू आडेकर २. नंदना नवनाथ आडेकर ३. सुरेश गेमू आडेकर ४. मनीषा सुरेश आडेकर ५. उत्तम गेमू आडेकर ६. छाया उत्तम आडेकर ७. गेमू किसन आडेकर ८. घमाबाई गेमू आडेकर (सर्व रा. कार्ला, ता. तुळजापूर, जि. धाराशिव)
नळदुर्ग पोलिसांनी या सर्व आरोपींवर भारतीय न्याय संहिता (BNS) कलम १८९, १८९(१)(२), ३२४(२), ३२९(१), ३५१(२) आणि ३५२ अन्वये गुन्हा नोंदवला असून, पोलीस या प्रकरणाचा पुढील तपास करत आहेत.
