धाराशिव: लाखो भाविकांचे श्रद्धास्थान असलेल्या तुळजाभवानी नगरीच्या जवळच एक धक्कादायक घटना उघडकीस आली आहे. नळदुर्ग-तुळजापूर राष्ट्रीय महामार्गावर तब्बल १० कोटी रुपये किंमतीचे अमली पदार्थ असलेली एक संशयित बॅग पोलिसांच्या हाती लागली आहे. या घटनेमुळे परिसरात खळबळ उडाली असून, पोलिसांकडून या प्रकरणाचा सखोल तपास सुरू आहे.
मिळालेल्या माहितीनुसार, नळदुर्ग-तुळजापूर महामार्गावर पोलिसांची नाकाबंदी सुरू होती. यावेळी एका संशयित वाहनाला थांबवण्याचा प्रयत्न पोलिसांनी केला. मात्र, वाहनातील दोन संशयित व्यक्तींनी त्यांच्याजवळील एक बॅग रस्त्यावर फेकून दिली आणि तिथून पळ काढला. पोलिसांनी तत्काळ ती बॅग ताब्यात घेतली.
तपासातील प्रमुख मुद्दे:
-
१० कोटींचे ड्रग्स: पोलिसांनी दिलेल्या प्राथमिक माहितीनुसार, या बॅगेत अमली पदार्थ असून त्याची बाजारातील किंमत सुमारे दहा कोटी रुपये असल्याचा अंदाज आहे.
-
फॉरेन्सिक टीम घटनास्थळी: हा अमली पदार्थ एका नवीन प्रकारचा असल्याने तो नेमका काय आहे, हे ओळखण्यास उशीर लागत आहे. मागील दोन दिवसांपासून पोलीस आणि फॉरेन्सिक लॅबची टीम घटनास्थळी तळ ठोकून असून वैज्ञानिक पद्धतीने तपास करत आहेत.
-
दोन दिवसांपासून तपास सुरू: सलग दोन दिवस पोलीस या बॅगेचा आणि फरार आरोपींचा शोध घेत असल्याने, या बॅगेमागे मोठे रॅकेट असल्याची शक्यता वर्तवली जात आहे.
नागरिकांमध्ये भीती, मात्र पोलिसांचे शांततेचे आवाहन
तुळजापूरसारख्या पवित्र आणि गजबजलेल्या शहरापासून काही अंतरावरच हा प्रकार घडल्याने नागरिकांच्या मनात मोठी भीती आणि विविध शंका-कुशंका निर्माण झाल्या आहेत. मात्र, धाराशिव पोलिसांतील वरिष्ठ अधिकाऱ्यांनी ‘न्यूज १८ मराठी’शी बोलताना या घटनेला दुजोरा दिला आहे. “बॅगेत अमली पदार्थच असून ते कोणत्या प्रकारचे आहेत याचा फॉरेन्सिक टीमच्या मदतीने शोध घेतला जात आहे,” अशी माहिती त्यांनी दिली. तसेच, परिस्थिती नियंत्रणात असून नागरिकांनी कोणतीही भीती बाळगू नये, असे आवाहनही पोलिसांनी केले आहे.
