येरमाळा : येथील प्रसिद्ध येडेश्वरी देवीच्या यात्रेमध्ये एकाच रात्रीत लुटमार आणि चोरीचे दोन गंभीर प्रकार उघडकीस आले आहेत. आमराई परिसरात नैसर्गिक विधीसाठी गेलेल्या दोघांना काठीने बेदम मारहाण करून लुटण्यात आले. तर दुसऱ्या एका घटनेत, एका व्यक्तीची कार फोडून तब्बल ९५ हजारांची रोकड लंपास करण्यात आली आहे. या दोन्ही घटना शनिवारी (ता. ४) रात्री घडल्या असून, रविवारी (ता. ५) येरमाळा पोलिस ठाण्यात दोन स्वतंत्र गुन्हे दाखल करण्यात आले आहेत.
नैसर्गिक विधीसाठी गेलेल्यांना बेदम मारहाण अन् लूट
पहिल्या घटनेत, गोरोबा कोंडीबा गायके (वय ४९, रा. वडार गल्ली, येरमाळा, ता. कळंब) हे त्यांच्या नातेवाइकांसह यात्रेसाठी आले होते. शनिवारी रात्री साडेनऊ ते दहा वाजेच्या सुमारास आमराई येथील दगडी हौदाच्या पश्चिमेकडील मोकळ्या जागेत ते नैसर्गिक विधीसाठी गेले होते. यावेळी तेथे अचानक आलेल्या तीन अज्ञात इसमांनी त्यांना काठीने मारहाण केली व त्यांच्या खिशातील ५ हजार रुपयांची रोख रक्कम जबरदस्तीने काढून घेतली. त्यांच्यासोबत असलेले लिंबराज कोकाटे यांनाही या चोरट्यांनी मारहाण करून त्यांच्याकडील ७ हजार रुपये आणि मोबाईल फोन हिसकावून घेतला. याप्रकरणी गोरोबा गायके यांच्या फिर्यादीवरून तीन अज्ञात आरोपींविरुद्ध भारतीय न्याय संहिता (BNS) कलम ३०९(२), ३(५) नुसार गुन्हा दाखल करण्यात आला आहे.
कारचे लॉक तोडून ९५ हजारांवर डल्ला
दुसऱ्या घटनेत, विशाल निळकंठ बारकुल (वय ३६, रा. येरमाळा) हे देखील शनिवारी रात्री दहा वाजेच्या सुमारास यात्रेत आले होते. त्यांनी आपली कार आमराई परिसरात लावली होती. कारमध्ये ग्रामपंचायत कार्यालयाची काही महत्त्वाची कागदपत्रे आणि ९५ हजार रुपयांची रोकड ठेवून त्यांनी कार लॉक केली व ते पाळण्याजवळ गेले. हीच संधी साधून अज्ञात चोरट्यांनी कारच्या दरवाजाचे लॉक तोडून (ज्यामुळे ३ हजारांचे नुकसान झाले) आतील ९५ हजारांची रोख रक्कम चोरून नेली. विशाल बारकुल हे परत आले असता हा प्रकार त्यांच्या लक्षात आला. त्यांच्या फिर्यादीवरून येरमाळा पोलिस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०५(२), ३२४(२) अन्वये गुन्हा नोंदवण्यात आला आहे.
यात्रेसारख्या गर्दीच्या ठिकाणी एकाच रात्रीत घडलेल्या या दोन घटनांमुळे भाविकांमध्ये चिंतेचे वातावरण निर्माण झाले असून, येरमाळा पोलिस या दोन्ही घटनांमधील अज्ञात आरोपींचा कसून शोध घेत आहेत.
