आंबी : रस्त्यावर आडवी लावलेली गाडी बाजूला घेण्यास सांगितल्याच्या रागातून पोलिसांशी हुज्जत घालत, अंगावर धावून जाऊन ‘व्हिडिओ काढून व्हायरल करतो आणि तुमचा माज जिरवतो’ अशी धमकी दिल्याचा धक्कादायक प्रकार सोनारी येथे घडला आहे. याप्रकरणी शासकीय कामात अडथळा निर्माण केल्याचा ठपका ठेवत आंबी पोलीस ठाण्यात दोघांवर गुन्हा दाखल करण्यात आला आहे.
श्रीकांत राजेंद्र पवार (रा. घुगी, ता. जि. धाराशिव) आणि अशोक शंकर देशमुख (रा. गौर वाघोली, ता. कळंब, जि. धाराशिव) अशी गुन्हा दाखल झालेल्या संशयित आरोपींची नावे आहेत.
पोलिसांकडून मिळालेल्या माहितीनुसार, आंबी पोलीस ठाण्यात कार्यरत असलेले पोलीस कर्मचारी सुशीलकुमार मुकुंद कोळेकर (वय ३५) हे इतर कर्मचाऱ्यांसह १५ एप्रिल रोजी सायंकाळी साडेचार वाजेच्या सुमारास सोनारी येथील रेस्ट हाऊस चौक ते परंडा जाणाऱ्या रस्त्यावर शासकीय कर्तव्य बजावत होते. यावेळी तिथे एक क्रूझर गाडी (क्र. एमएच २४ व्ही ४२६७) रस्त्यावर आडवी लावलेली होती. या गाडीमुळे मोठी वाहतूक कोंडी झाल्याने, पोलीस कर्मचारी कोळेकर यांनी संबंधित गाडीधारकांना ‘तुमच्या गाडीमुळे ट्रॅफिक जॅम झाले आहे, वाहन बाजूला काढा’ असे सांगितले.
वाहन काढण्यास सांगितल्याचा राग आल्याने संशयित आरोपी श्रीकांत पवार आणि अशोक देशमुख यांनी कोळेकर व इतर पोलीस कर्मचाऱ्यांसोबत उद्धटपणाची आणि आरेरावीची भाषा वापरत आरडाओरड सुरू केली. तसेच पोलिसांच्या अंगावर धावून जात, ‘तुमचा व्हिडीओ काढून तो व्हायरल करून तुमचा माज जिरवतो’ अशी थेट धमकी दिली. या सर्व प्रकारामुळे पोलिसांच्या शासकीय कामात मोठा अडथळा निर्माण झाला.
या प्रकरणी पोलीस कर्मचारी सुशीलकुमार कोळेकर यांनी १६ एप्रिल रोजी दिलेल्या फिर्यादीवरून संशयित आरोपी श्रीकांत पवार आणि अशोक देशमुख यांच्याविरुद्ध आंबी पोलीस ठाण्यात भारतीय न्याय संहिता (BNS) कलम १३२, २२३, २८२, ३(५) अन्वये गुन्हा नोंदवण्यात आला आहे. या प्रकरणाचा पुढील तपास आंबी पोलीस करत आहेत.
