ढोकी : ‘तू मला आवडतेस’ असे सांगून एका १५ वर्षीय अल्पवयीन मुलीवर तिच्याच गावातील एका तरुणाने वारंवार लैंगिक अत्याचार केल्याची अत्यंत संतापजनक घटना उघडकीस आली आहे. ‘याबद्दल कोणाला काही सांगितले, तर तुला आणि तुझ्या आईला जिवे मारीन’, अशी गंभीर धमकीही या नराधमाने दिली होती. या प्रकरणी पीडितेच्या जबाबावरून ढोकी पोलीस ठाण्यात आरोपी तरुणावर पोक्सो (POCSO) आणि भारतीय न्याय संहितेअंतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित मुलीचे वय १५ वर्षे असून (नाव व गाव गोपनीय), ती आरोपीच्याच गावातील रहिवासी आहे. १ एप्रिल २०२५ ते ४ एप्रिल २०२६ या वर्षभराच्या कालावधीत हा धक्कादायक प्रकार घडला. आरोपी तरुणाने पीडित मुलीला ‘तू मला आवडतेस’ असे म्हणून तिच्या तसेच स्वतःच्या घरात नेऊन तिच्यावर वारंवार लैंगिक अत्याचार केले.
या भयानक प्रकारामुळे अल्पवयीन मुलगी प्रचंड दहशतीखाली होती. नराधम आरोपीने तिला ‘ घडलेल्या प्रकाराबाबत कोणाला काहीही सांगितले, तर तुला आणि तुझ्या आईला जिवे ठार मारीन,’ अशी धमकी दिली होती. त्यामुळे भितीपोटी तिने सुरुवातीला हा प्रकार कुणालाही सांगितला नाही.
मात्र, अखेर १६ एप्रिल २०२६ रोजी पीडितेने पोलिसांसमोर आपबिती मांडली. पीडित मुलीने दिलेल्या वैद्यकीय जबाबावरून ढोकी पोलीस ठाण्यात आरोपी तरुणाविरुद्ध भारतीय न्याय संहिता (BNS) कलम ६४(२)(आय)(एम), ६५(१), ७८, ३५१(२)(३) आणि बालकांचे लैंगिक अत्याचारापासून संरक्षण कायदा (पोक्सो) कलम ४, ६, ८ अन्वये गंभीर गुन्ह्याची नोंद करण्यात आली आहे. या घटनेमुळे परिसरात तीव्र संताप व्यक्त केला जात असून, प्रकरणाचा पुढील तपास ढोकी पोलीस करत आहेत.
