ढोकी : बारमधील दारूच्या उधारीचे पैसे मागितल्याच्या रागातून एका २७ वर्षीय तरुणावर लोखंडी कोयता आणि हंटरने अमानुष हल्ला केल्याची खळबळजनक घटना ढोकी (ता. जि. धाराशिव) येथील जयभवानी नगर परिसरात घडली आहे. या मारहाणीत तरुण गंभीर जखमी झाला असून, याप्रकरणी बार्शी (जि. सोलापूर) येथील दोघांवर ढोकी पोलीस ठाण्यात गुन्हा दाखल करण्यात आला आहे.
अजय आण्णासाहेब कवडे (वय २७, रा. जयभवानी नगर, ढोकी) असे या हल्ल्यात गंभीर जखमी झालेल्या फिर्यादी तरुणाचे नाव आहे. याप्रकरणी हंसराज साठे आणि निखील साठे (दोघे रा. बार्शी, जि. सोलापूर) यांच्याविरुद्ध गुन्हा नोंदवण्यात आला आहे.
पोलिसांनी दिलेल्या माहितीनुसार, शुक्रवार (दि. १७ एप्रिल) रोजी रात्री साडेअकरा वाजेच्या सुमारास अजय कवडे हे जयभवानी नगर येथील आंबाबाई मंदिराजवळ थांबले होते. यावेळी आरोपी हंसराज साठे आणि निखील साठे हे दोघे तेथे आले. त्यांनी अजयला गाठून, ‘तू बारमधील दारूची उधारी मागून आमची लोकांत इज्जत का काढतोस?’ असा जाब विचारत शिवीगाळ करण्यास सुरुवात केली.
या शाब्दिक वादाचे रूपांतर हाणामारीत झाले. दोन्ही आरोपींनी अजयला खाली पाडून लाथाबुक्क्यांनी मारहाण केली. त्यानंतर आरोपींनी सोबत आणलेल्या लोखंडी कोयत्याने आणि हंटरने अजयवर सपासप वार केले, ज्यामध्ये ते गंभीर जखमी झाले. एवढ्यावरच न थांबता आरोपींनी हंटरचे घाव घालून अजय यांचा मोबाईल फोनही फोडून टाकला आणि मोठे नुकसान केले.
या घटनेनंतर शनिवारी (दि. १८ एप्रिल) अजय कवडे यांनी ढोकी पोलीस ठाण्यात धाव घेत घडलेल्या प्रकाराची फिर्याद दिली. या खबरीवरून पोलिसांनी हंसराज साठे आणि निखील साठे या दोन्ही आरोपींविरुद्ध भारतीय न्याय संहिता (BNS) कलम १८१(२), ३२४(४), ११५(२), ३५२ आणि ३(५) अन्वये गुन्हा दाखल केला आहे. या प्रकरणाचा पुढील तपास ढोकी पोलीस करत आहेत.
