धाराशिव : एसटी बसमध्ये चढत असताना गर्दीचा फायदा घेत एका अज्ञात महिला चोरट्याने प्रवासी महिलेच्या पर्समधील सोन्याचे दागिने आणि १० हजार रुपयांची रोकड असा एकूण ६० हजार रुपयांचा ऐवज हातोहात लांबवल्याची घटना धाराशिव बसस्थानकात घडली आहे. या प्रकरणी आनंदनगर पोलीस ठाण्यात अज्ञात महिलेविरुद्ध गुन्हा दाखल करण्यात आला आहे.
साखरबाई हनुमंत दराडे (वय ४८, रा. भालगाव, ता. बार्शी, जि. सोलापूर) असे चोरीला बळी पडलेल्या फिर्यादी महिलेचे नाव आहे.
पोलिसांनी दिलेल्या माहितीनुसार, साखरबाई दराडे या शुक्रवारी (दि. १७ एप्रिल) सायंकाळी साडेसहा वाजेच्या सुमारास गावी परतण्यासाठी धाराशिव मध्यवर्ती बसस्थानकात आल्या होत्या. यावेळी फलाटावर लागलेल्या धाराशिव-सोलापूर बसमध्ये त्या चढत होत्या. बसमध्ये चढणाऱ्या प्रवाशांची मोठी गर्दी होती. याच गर्दीचा गैरफायदा घेत एका अज्ञात महिलेने साखरबाई यांच्या जवळील पर्सची चेन उघडून त्यातील सोन्याचे दागिने आणि १० हजार रुपये रोख रक्कम असा एकूण ६० हजार रुपये किमतीचा ऐवज अत्यंत शिताफीने चोरून नेला.
बसमध्ये बसल्यानंतर काही वेळाने आपली पर्स उघडी असल्याचे आणि त्यातील दागिने, तसेच रोकड गायब असल्याचे साखरबाई यांच्या लक्षात आले. आजूबाजूला आणि बसस्थानक परिसरात शोधाशोध करूनही त्यांना आपला ऐवज आणि ती संशयित महिला मिळून आली नाही.
अखेर या घटनेप्रकरणी साखरबाई दराडे यांनी शनिवारी (दि. १८ एप्रिल) आनंदनगर पोलीस ठाण्यात जाऊन घडलेल्या प्रकाराची फिर्याद दिली. त्यांनी दिलेल्या प्रथम खबरीवरून अज्ञात महिला आरोपीविरुद्ध भारतीय न्याय संहिता (BNS) कलम ३०३(२) अन्वये चोरीचा गुन्हा नोंदवण्यात आला आहे. बसस्थानक परिसरातील सीसीटीव्ही कॅमेऱ्यांच्या आधारे आनंदनगर पोलीस या गुन्ह्याचा अधिक तपास करत आहेत.
