परंडा : परंडा तालुक्यातील टाकळी येथील यमाई देवी मंदिराचे कुलूप तोडून अज्ञात चोरट्यांनी देवीचा दीड किलो चांदीचा मुकुट, सोन्याचे दागिने आणि दानपेटीतील रोख रक्कम असा एकूण १ लाख २१ हजार रुपयांचा ऐवज चोरून नेल्याची खळबळजनक घटना उघडकीस आली आहे. या प्रकरणी परंडा पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
मंदिरातील सेवेकरी आणि पुजारी असलेल्या रत्नमाला अशोक काळे (वय ५५, रा. टाकळी, ता. परंडा, जि. धाराशिव) यांनी यासंदर्भात परंडा पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शुक्रवार (दि. १७ एप्रिल) सायंकाळी सात ते शनिवार (दि. १८ एप्रिल) सकाळी साडेसात वाजेच्या दरम्यान ही चोरीची घटना घडली. रात्रीच्या वेळी अज्ञात चोरट्यांनी मंदिराच्या मुख्य गेटचे कुलूप तोडून आत प्रवेश केला. त्यानंतर चोरट्यांनी देवीचा दीड किलो वजनाचा चांदीचा मुकुट आणि ३ ग्रॅम वजनाचे सोन्याचे दागिने लंपास केले. एवढ्यावरच न थांबता चोरट्यांनी मंदिरातील दानपेटी फोडून त्यातील एक हजार रुपयांची रोख रक्कमही चोरून नेली.
शनिवारी सकाळी मंदिरात गेल्यानंतर हा चोरीचा प्रकार उघडकीस आला. या चोरीत चांदीचा मुकुट, सोन्याचे दागिने आणि रोख रक्कम असा एकूण १ लाख २१ हजार रुपये किमतीचा ऐवज चोरीला गेला आहे.
या घटनेनंतर रत्नमाला काळे यांनी दिलेल्या प्रथम खबरीवरून परंडा पोलीस ठाण्यात अज्ञात व्यक्तीविरुद्ध भारतीय न्याय संहिता (BNS) कलम ३३१(४) आणि ३०५(ए) अन्वये गुन्हा नोंदवण्यात आला आहे. धार्मिक स्थळी झालेल्या या चोरीमुळे भाविकांमध्ये संतापाचे वातावरण असून, परंडा पोलीस या घटनेचा कसून तपास करत आहेत.
