परंडा : ‘सार्वजनिक जागा माझ्या नावावर का केली नाही,’ असा जाब विचारत पंचायत समिती कार्यालयाजवळ एका शासकीय कर्मचाऱ्याला अडवून मारहाण केल्याची घटना गुरुवारी (ता. १६) दुपारी घडली. याप्रकरणी खोटी केस टाकण्याची धमकी देत शासकीय कामात अडथळा निर्माण केल्याचा ठपका ठेवत रविवारी (ता. १९) परंडा पोलिस ठाण्यात एका महिलेवर गुन्हा दाखल करण्यात आला आहे.
युवराज बिभीषण भोसले (वय ३८, रा. सोनारी, ता. परंडा) असे मारहाण झालेल्या फिर्यादीचे नाव आहे. तर अश्विनी बाबुराव मगर (रा. शेळगाव, ता. परंडा) असे गुन्हा दाखल झालेल्या संशयित आरोपी महिलेचे नाव आहे.
पोलिसांनी दिलेल्या माहितीनुसार, फिर्यादी युवराज भोसले हे पंचायत समितीमध्ये शासकीय कामकाज करत आहेत. गुरुवारी (ता. १६) दुपारी एक वाजेच्या सुमारास ते शासकीय काम करत असताना संशयित आरोपी अश्विनी मगर हिने त्यांना पंचायत समिती कार्यालयाजवळ रस्त्यावर अडवले. ‘तू शेळगाव येथे नेमणुकीस असताना माझ्या घराच्या शेजारी असलेली सार्वजनिक ७ बाय ३३ ची जागा माझ्या नावावर का केली नाही,’ अशी विचारणा करत तिने भोसले यांच्या गालात चापटी मारली. तसेच, त्यांच्यावर खोटी केस टाकण्याची धमकी देऊन शासकीय कामात अडथळा निर्माण केला.
या प्रकारानंतर युवराज भोसले यांनी रविवारी (ता. १९) परंडा पोलिस ठाण्यात धाव घेत तक्रार दिली. या प्रथम खबरेवरून पोलिसांनी आरोपी अश्विनी मगर हिच्याविरुद्ध भारतीय न्याय संहिता (BNS) कलम १३२, २२१, १२६(२), २२४, ११५ सह महाराष्ट्र पोलिस कायदा कलम ११०, ११२, ११७ अन्वये गुन्हा दाखल केला आहे. या प्रकरणाचा पुढील तपास परंडा पोलिस करत आहेत.
