धाराशिव: राज्यभरात महिला सुरक्षेच्या मुद्द्यावर रान पेटलेले असताना, धाराशिवमधील एका ‘प्रतिष्ठित’ आणि ‘नामांकित’ महाविद्यालयाने मात्र अब्रूचे धिंडवडे उडवणारा एक नवा पायंडा पाडला आहे. एप्रिल महिन्यात घडलेला एका गंभीर छेडछाडीचा प्रकार पोलिसांपर्यंत जाऊ न देता चक्क ‘मॅनेज’ करण्यात आला असून, मुलींच्या सुरक्षिततेवर एक मोठे प्रश्नचिन्ह निर्माण झाले आहे.
या धक्कादायक प्रकरणातील ठळक मुद्दे खालीलप्रमाणे:
-
‘पॉवर’ आणि ‘शिंगां’चा खेळ:
मिळालेल्या माहितीनुसार, छेड काढणारा महाशय डोक्याला ‘शिंग’ असल्यासारखा (म्हणजेच बऱ्यापैकी राजकीय वा आर्थिक वरदहस्त असलेला) आहे. विशेष म्हणजे यात अडकलेली महिला प्राध्यापिकाही चांगलीच ‘पॉवरफुल’ असल्याने, संस्थेची बदनामी नको या गोंडस नावाखाली हे संपूर्ण प्रकरण अत्यंत शिताफीने दाबण्यात आले.
-
पोलिसांत नोंद नाही, पण…:
या गंभीर प्रकाराची पोलिसांत कोणतीही अधिकृत नोंद नाही. मात्र, संबंधित महिला आणि तिचे पती पोलीस ठाण्याची पायरी चढून आल्याची आणि तिथेच काहीतरी ‘सेटलमेंट’ झाल्याची खात्रीलायक माहिती सूत्रांनी दिली आहे. एप्रिल महिन्यात घडलेल्या या घटनेची साधी भणकही बाहेर न लागण्याची काळजी महाविद्यालयाने घेतली आहे.
-
माध्यमांच्या खांद्यावर बंदूक आणि ‘पाकिटांची’ उब:
या प्रकरणातील सर्वात संतापजनक भाग म्हणजे, या घटनेला वाचा फोडण्याऐवजी काही ‘दांडकेबहाद्दर’ पत्रकारांनी चक्क ‘पाकिटे’ स्वीकारून मूग गिळून गप्प बसणे पसंत केले आहे. माध्यमांच्या खांद्यावर बंदूक ठेवून मोठी ‘डील’ झाल्याची आणि हे प्रकरण कायमचे रफादफा करण्यासाठी काहींचे खिसे गरम केल्याची शहरात सध्या खमंग चर्चा रंगली आहे.
पालकांसमोर उभा राहिलाय यक्षप्रश्न!
आपली मुलगी एका नामांकित आणि सुरक्षित महाविद्यालयात शिकते आहे, या भाबड्या आशेवर मुलींना शिक्षणासाठी पाठवणाऱ्या सुज्ञ पालकांच्या काळजात या घटनेने धस्स झाले आहे. जर शिक्षणाचे पवित्र मंदिरच ‘पॉवर’ आणि ‘पाकिटांच्या’ बळावर अशा प्रवृत्तींना पाठीशी घालत असेल, तर मुलींच्या सुरक्षिततेची हमी कुणी घ्यायची? हा प्रश्न आता ऐरणीवर आला आहे. प्रशासनाने आणि पोलिसांनी या ‘पाकीट’ प्रकरणाची स्वतःहून दखल घेऊन यामागचे सत्य बाहेर काढणे गरजेचे आहे.
