धाराशिव: तुळजापूर पोलीस ठाण्यातील सहाय्यक पोलीस फौजदार श्रीनिवास आरदवाड यांना ५ हजार रुपयांची लाच घेताना निलंबित करण्यात आले. मात्र, या गंभीर प्रकरणानंतरही पोलीस ठाण्याचे प्रभारी अधिकारी अण्णासाहेब मांजरे यांच्यावर वरिष्ठ स्तरावरून कोणतीही कारवाई करण्यात आली नसल्याची धक्कादायक माहिती समोर आली आहे. ‘धाराशिव लाईव्ह’ने माहिती अधिकारात (RTI) विचारलेल्या प्रश्नावर खुद्द पोलीस अधीक्षक कार्यालयानेच हे लेखी उत्तर दिले आहे.
इतर अधिकाऱ्यांचा न्याय मांजरे यांना का नाही?
धाराशिव शहर पोलीस स्टेशनसह जिल्ह्यातील इतर काही पोलीस स्टेशनमध्ये यापूर्वी लाचेचे प्रकरण घडल्यानंतर, वरिष्ठांनी तात्काळ कारवाई करत संबंधित प्रभारी अधिकाऱ्यांची पोलीस मुख्यालयात उचलबांगडी केली होती. कर्मचाऱ्याने लाच घेतल्यास प्रभारी अधिकाऱ्याला जबाबदार धरण्याची पद्धत असताना, तुळजापूरच्या बाबतीत मात्र हा नियम का बदलला? लाचखोरीचा प्रकार घडूनही अण्णासाहेब मांजरे यांना अभय का दिले जात आहे? असा सवाल या निमित्ताने उपस्थित झाला आहे.
माहिती अधिकारात नेमके काय उघड झाले?
‘धाराशिव लाईव्ह’चे संपादक सुनील ढेपे यांनी पोलीस अधीक्षक कार्यालयाकडे माहिती अधिकारात दोन प्रमुख मुद्दे विचारले होते.
१) सपोफौ एस.आर. आरदवाड यांना निलंबित करण्यात आले आहे काय? आणि त्या आदेशाची प्रत मिळावी.
२) तुळजापूर पोलीस ठाण्याचे प्रभारी अधिकारी अण्णासाहेब मांजरे यांच्यावर वरिष्ठ स्तरावरून काय कारवाई करण्यात आली आहे?
यावर पोलीस अधीक्षक कार्यालयातील विभागीय चौकशी शाखेने (दिनांक ६ मे २०२६ रोजी) दिलेल्या लेखी उत्तरात स्पष्ट केले आहे की, आरदवाड यांना निलंबित करण्यात आले आहे. परंतु, दुसऱ्या प्रश्नावर उत्तर देताना, “प्रभारी अधिकारी श्री. अण्णासाहेब मांजरे यांच्यावर वरिष्ठ स्तरावरून काय कारवाई करण्यात आली याबाबत या कार्यालयास काहीएक माहिती नाही,” अशी स्पष्ट कबुली दिली आहे.
पोलीस वर्तुळात उलट-सुलट चर्चा
एकीकडे लाचखोरीच्या प्रकरणात इतर पोलीस ठाण्यांच्या प्रमुखांवर तात्काळ कारवाईचा बडगा उगारला जातो, तर दुसरीकडे मांजरे यांच्यावर कारवाईबाबत पोलीस अधीक्षक कार्यालयालाच ‘काहीएक माहिती नाही‘, हा प्रकार अनेक प्रश्न निर्माण करणारा आहे. मांजरे यांना कोणाचे पाठबळ आहे आणि त्यांना जाणीवपूर्वक का वाचवले जात आहे? यावरून आता धाराशिव जिल्ह्यात आणि पोलीस वर्तुळात उलट-सुलट चर्चा सुरू झाली आहे. प्रशासकीय पारदर्शकतेवरच यामुळे मोठे प्रश्नचिन्ह निर्माण झाले आहे.
