धाराशिव: जिल्ह्यात अवैध शस्त्रे बाळगणाऱ्यांवर स्थानिक गुन्हे शाखेने धडक कारवाई केली असून, दोन गावठी कट्टे आणि एका चोरीच्या मोटारसायकलसह एका आरोपीला गजाआड केले आहे. ही कारवाई १८ मे २०२६ रोजी दुपारी ४ वाजेच्या सुमारास कळंब तालुक्यातील कन्हेरवाडी पाटी येथे करण्यात आली. या कारवाईदरम्यान एक आरोपी मात्र पोलिसांना गुंगारा देऊन पळून जाण्यात यशस्वी झाला आहे.
पोलिसांनी दिलेल्या माहितीनुसार, धाराशिव जिल्ह्यातील अवैध शस्त्रे बाळगणारे आणि फरारी आरोपींचा शोध घेण्यासाठी स्थानिक गुन्हे शाखेचे पथक पेट्रोलिंग करत होते. हे पथक कन्हेरवाडी गावाजवळ आले असता, गुप्त बातमीदाराकडून त्यांना महत्त्वाची माहिती मिळाली. प्रशांत ऊर्फ भमड्या बालाजी काळे (रा. कन्हेरवाडी, ता. कळंब) आणि अशोक नाना पवार (रा. बावी, ता. वाशी) हे दोघे एका मोटारसायकलवरून कन्हेरवाडी पाटी येथे येणार असून, त्यांच्याकडे अग्निशस्त्र असल्याची खात्रीलायक माहिती पोलिसांना मिळाली होती.
असा रचला सापळा:
मिळालेल्या माहितीच्या आधारे, पोलिसांनी कन्हेरवाडी पाटी येथे सापळा लावला. काही वेळातच दोन इसम विना नंबर प्लेटच्या दुचाकीवरून येताना पोलिसांना दिसले. पोलिसांनी त्यांना थांबवण्याचा प्रयत्न केला असता, त्यातील एकाने स्वतःजवळील गावठी कट्टा खाली टाकून घटनास्थळावरून पळ काढला. मात्र, पोलिसांनी तत्परता दाखवत दुसऱ्या इसमाला जागीच पकडले.
चोरीच्या दुचाकीचेही बिंग फुटले:
ताब्यात घेतलेल्या इसमाची चौकशी केली असता त्याने आपले नाव अशोक नाना पवार (रा. बावी शिवार, ता. वाशी, सध्या रा. कन्हेरवाडी, ता. कळंब) असे सांगितले. त्याची अंगझडती घेतली असता त्याच्या कमरेला आणखी एक गावठी कट्टा आढळून आला. पळून गेलेल्या साथीदाराबाबत चौकशी केली असता, त्याचे नाव विशाल ऊर्फ प्रकाश ऊर्फ भामड्या बालाजी काळे असल्याचे त्याने सांगितले. पोलिसांनी त्यांच्याकडच्या विना नंबर प्लेट दुचाकीबाबत चौकशी केली असता, ती लातूर जिल्ह्यातील मुरुड येथून चोरी केल्याची कबुली आरोपीने दिली. या दुचाकी चोरीप्रकरणी मुरुड पोलीस ठाण्यात (गु.र.नं. ०४/२०२५, कलम ३०३ प्रमाणे) गुन्हा दाखल असल्याचेही निष्पन्न झाले आहे. पोलिसांनी दोन्ही गावठी कट्टे आणि चोरीची दुचाकी जप्त केली आहे.
ही यशस्वी कारवाई धाराशिवच्या पोलीस अधीक्षक श्रीमती रितू खोखर यांच्या मार्गदर्शनाखाली, स्थानिक गुन्हे शाखेचे पोलीस निरीक्षक विनोद ईज्जपवार, सहाय्यक पोलीस निरीक्षक अमोल मोरे, पोलीस हवालदार राहुल नाईकवाडी, बळीराम शिंदे, अमोल चव्हाण, महिला पोलीस हवालदार शोभा बांगर आणि चालक पोलीस कॉन्स्टेबल दहीहांडे यांच्या पथकाने केली.
