परंडा : ‘एका व्यक्तीला माझे नाव का सांगितले?’ अशी विचारणा केल्याच्या रागातून एका २७ वर्षीय तरुणाला शिवीगाळ करत लोखंडी रॉड आणि काठीने बेदम मारहाण केल्याची धक्कादायक घटना परंडा तालुक्यातील साकत बुद्रुक शिवार येथे घडली. या मारहाणीत तरुण गंभीर जखमी झाला असून, याप्रकरणी परंडा पोलीस ठाण्यात चार जणांविरुद्ध गुन्हा दाखल करण्यात आला आहे.
कृष्णा सतीश शिंदे (वय २७, रा. रोहकल, ता. परंडा, जि. धाराशिव) असे गंभीर जखमी झालेल्या फिर्यादी तरुणाचे नाव आहे. याप्रकरणी त्यांनी दिलेल्या तक्रारीवरून महारुद्र बाबुराव जाधव, रामभाऊ बाबुराव जाधव, गणेश महारुद्र जाधव आणि अनिरुद्र महारुद्र जाधव (सर्व रा. रोहकल, ता. परंडा) यांच्यावर गुन्हा नोंदवण्यात आला आहे.
पोलिसांनी दिलेल्या माहितीनुसार, कृष्णा शिंदे आणि आरोपी हे एकाच गावातील रहिवासी आहेत. मंगळवारी (दि. १२) रात्री १० वाजण्याच्या सुमारास कृष्णा हा साकत बुद्रुक शिवारातील साकत तलावावर गेला होता. त्यावेळी तिथे असलेल्या आरोपींना त्याने ‘नाईनमेन समिंद्रे यास माझे नाव का सांगितले?’ अशी विचारणा केली. केवळ याच गोष्टीचा राग मनात धरून चारही आरोपींनी कृष्णाला शिवीगाळ करण्यास सुरुवात केली. त्यानंतर लाथाबुक्क्यांनी मारहाण करत लोखंडी रॉड आणि काठीने मारून त्याला गंभीर जखमी केले. तसेच त्याला जीवे ठार मारण्याची धमकीही दिली.
या घटनेनंतर जखमी कृष्णा शिंदे यांनी सोमवारी (दि. १८) परंडा पोलीस ठाण्यात धाव घेत रीतसर फिर्याद दिली. त्यांच्या या प्रथम खबरेवरून पोलिसांनी वरील चारही आरोपींविरुद्ध नवीन फौजदारी कायदा म्हणजेच भारतीय न्याय संहितेच्या (भा.न्या.सं.) कलम ११८(२), ११८(१), ११५(२), ३५२, ३५१(२) आणि ३(५) नुसार गुन्हा दाखल केला आहे. या प्रकरणाचा पुढील तपास परंडा पोलीस करत आहेत.
