कळंब : ‘माझ्या विरुद्धच्या अहवालावर सह्या केल्याने मी जेलमध्ये गेलो होतो,’ याचा राग मनात धरून एका तरुणाला व त्याच्या मित्राला जातीवाचक शिवीगाळ करत काठीने मारहाण केल्याची घटना कळंब शहरात उघडकीस आली आहे. या मारहाणीत तरुण जखमी झाला असून, याप्रकरणी कळंब पोलीस ठाण्यात एकाविरुद्ध ॲट्रॉसिटीसह विविध कलमांन्वये गुन्हा दाखल करण्यात आला आहे.
अंकुश अरुण लोकरे (वय ३४, रा. बाबानगर, कळंब, जि. धाराशिव) असे मारहाण झालेल्या फिर्यादी तरुणाचे नाव आहे. याप्रकरणी त्यांनी दिलेल्या तक्रारीवरून आकाश भागवत चोंदे (रा. चोंदेगल्ली, कळंब) याच्यावर गुन्हा नोंदवण्यात आला आहे.
पोलिसांनी दिलेल्या माहितीनुसार, रविवारी (दि. १७) रात्री साडेदहा वाजेच्या सुमारास कळंब येथील केज रोडवरील मुळे बॅटरी दुकानासमोर ही घटना घडली. फिर्यादी अंकुश लोकरे आणि त्यांचा मित्र राहुल बिभीषण वाघमारे हे तेथे उभे होते. त्यावेळी आरोपी आकाश चोंदे तिथे आला. त्याने फिर्यादीस ‘तू व तुझा मित्र अशा दोघांनी मिळून माझ्या अहवालावर सह्या केल्यामुळे मी जेलमध्ये गेलो होतो,’ असे म्हणत वाद घालण्यास सुरुवात केली.
याच रागातून आरोपीने अंकुश लोकरे यांना भररस्त्यात जातीवाचक शिवीगाळ केली. तसेच लाथाबुक्क्यांनी व काठीने बेदम मारहाण करत त्यांना जखमी केले. एवढ्यावरच न थांबता त्याने जिवे ठार मारण्याची धमकीही दिली.
या धक्कादायक घटनेनंतर जखमी फिर्यादी अंकुश लोकरे यांनी सोमवारी (दि. १८) कळंब पोलीस ठाण्यात धाव घेत रीतसर फिर्याद दिली. त्यांच्या या प्रथम खबरेवरून पोलिसांनी आरोपी आकाश चोंदे याच्याविरुद्ध भारतीय न्याय संहिता (भा.न्या.सं.) कलम ११८(१), ११५(२), ३५२, ३५१(३) सह अनुसूचित जाती व अनुसूचित जमाती (अत्याचार प्रतिबंधक) कायदा (ॲट्रॉसिटी) कलम ३(१)(आर), ३(१)(एस) आणि ३(२)(व्हीए) नुसार गुन्हा दाखल केला आहे. या प्रकरणाचा पुढील तपास कळंब पोलीस करत आहेत.
