तामलवाडी : तुळजापूर तालुक्यातील वडगाव काटी शिवारात गैरकायद्याची मंडळी जमवून एका तरुणाला व त्याच्या भावाला काठीने आणि लाथाबुक्क्यांनी बेदम मारहाण केल्याची घटना समोर आली आहे. या मारहाणीत तरुणाच्या गळ्यातील अडीच तोळ्याची सोन्याची साखळी (चेन) पळवण्यात आली असून, याप्रकरणी तामलवाडी पोलीस ठाण्यात पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पंकज संतोष धावणे (वय ३०, रा. वडगाव काटी, ता. तुळजापूर, जि. धाराशिव) यांनी यासंदर्भात फिर्याद दिली आहे. १ मे २०२६ रोजी रात्री १०.२० वाजेच्या सुमारास वडगाव काटी शिवारातील गट नं. ४५ मध्ये ही घटना घडली. आरोपी जितेंद्र काळे, मनोज भानुदास काळे, सुखदेव भानुदास काळे, श्रीकांत काळे आणि सचिन काळे (सर्व रा. वडगाव काटी) यांनी गैरकायद्याची मंडळी जमवून फिर्यादी पंकज धावणे आणि त्यांच्या भावाला अडवले.
यावेळी आरोपींनी त्यांना शिवीगाळ करत लाथाबुक्क्यांनी व काठीने बेदम मारहाण केली आणि जखमी केले. याच झटापटीत आरोपींनी पंकज यांच्या गळ्यातील अडीच तोळ्याची सोन्याची चेन जबरदस्तीने काढून घेतली, तसेच त्यांना जिवे ठार मारण्याची धमकी दिल्याचे फिर्यादीत नमूद करण्यात आले आहे.
या घटनेप्रकरणी पंकज धावणे यांनी १९ मे २०२६ रोजी दिलेल्या प्रथम खबरीवरून तामलवाडी पोलीस ठाण्यात वरील पाचही आरोपींविरुद्ध भारतीय न्याय संहिता (BNS) कलम ११८(१), ११९(१), ११५(२), ३५२, ३५१(२), ३५१(३), १८९(२), १९१(२), १९१(३) आणि १९० अन्वये गुन्हा नोंदवण्यात आला आहे. या प्रकरणाचा पुढील तपास तामलवाडी पोलीस करत आहेत.
