परंडा: परंडा शहरातील कुरेशी गल्ली भागात कत्तल करण्याच्या उद्देशाने गोवंशीय जनावरांना अत्यंत निर्दयपणे आणि बेकायदेशीररीत्या डांबून ठेवल्याचा धक्कादायक प्रकार परंडा पोलिसांनी उघडकीस आणला आहे. पोलिसांनी रात्रीच्या सुमारास टाकलेल्या छाप्यात एकूण ४० हजार रुपये किमतीच्या ४ गायींची सुटका करण्यात आली असून, याप्रकरणी तीन जणांविरुद्ध प्राणी छळ प्रतिबंधक कायद्यानुसार गुन्हा दाखल करण्यात आला आहे.
याप्रकरणी परंडा पोलिसांनी दिलेल्या माहितीनुसार, इम्रान गणी कुरेशी, बब्बु कुरेशी आणि अमजद कुरेशी (सर्व रा. कुरेशी गल्ली, परंडा, ता. परंडा, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी पोलिसांकडून सरकारतर्फे फिर्याद देण्यात आली आहे.
गुप्त माहितीवरून रात्रीचा छापा
परंडा शहरातील कुरेशी गल्ली परिसरात काही जनावरे कत्तलीच्या उद्देशाने बेकायदेशीरपणे डांबून ठेवण्यात आल्याची गोपनीय माहिती परंडा पोलिसांना मिळाली होती. या माहितीच्या आधारे पोलिसांच्या पथकाने सोमवारी (दि. २५ मे) रात्री ११ वाजेच्या सुमारास संशयित ठिकाणी अचानक छापा टाकला.
चारा-पाण्याविना जनावरांचा छळ
पोलिसांनी घटनास्थळाची पाहणी केली असता, तिथल्या एका आवारात गोवंशीय जातीच्या २ जर्शी गायी आणि २ गावरान गायी (एकूण ४ जनावरे, अंदाजे किंमत ४० हजार रुपये) अत्यंत निर्दयतेने दोरीने बांधून ठेवल्याचे आढळून आले. आरोपींनी या जनावरांना खाण्यासाठी चारा अथवा पिण्याच्या पाण्याची कोणतीही व्यवस्था केली नव्हती. अत्यंत कोंदट आणि क्रूर परिस्थितीत या गायींना कत्तलखान्यात पाठवण्यासाठी डांबून ठेवण्यात आले होते. पोलिसांनी तात्काळ सर्व जनावरांची सुटका करत ती सुरक्षित स्थळी रवाना केली.
गंभीर कलमांखाली गुन्हा नोंद
या बेकायदेशीर कृत्याबद्दल परंडा पोलिसांनी तिन्ही आरोपींविरुद्ध ‘प्राण्यांना क्रूरतेने वागवण्यास प्रतिबंध अधिनियम’ कलम ११(१), ११(१)(ए), ११(१)(एफ), ११(१)(एच), ११(१)(आय) सह कलम २(अ), ५(बी), ९(ब), ११ ‘महाराष्ट्र प्राणी संरक्षण अधिनियम’ अन्वये गुन्हा दाखल केला आहे. याप्रकरणी पोलीस पुढील कायदेशीर कारवाई करत आहेत.
