शिराढोण: बोरवंटी शिवारातील पारधी पिढी परिसरात लोकांच्या जीवितास धोका निर्माण होईल अशा पद्धतीने विनापरवाना व बेकायदेशीररित्या लोखंडी कत्ती बाळगून फिरणाऱ्या एका तरुणाला शिराढोण पोलिसांनी रंगेहात पकडले आहे. पोलिसांनी त्याच्याकडचे घातक शस्त्र जप्त केले असून, संबंधित तरुणाविरुद्ध शस्त्र कायद्यान्वये गुन्हा दाखल केला आहे.
याप्रकरणी पोलिसांनी दिलेल्या माहितीनुसार, रामण फुलचंद पवार (वय ३४, रा. बोरवंटी पारधी पिढी, ता. कळंब, जि. धाराशिव) असे अटक करण्यात आलेल्या संशयित आरोपीचे नाव आहे. या कारवाईत पोलिसांनी त्याच्या ताब्यातून लोखंडी कत्ती जप्त केली आहे.
शिराढोण पोलीस ठाण्याचे पथक बुधवारी (दि. २७ मे) सायंकाळच्या सुमारास कळंब तालुक्यातील बोरवंटी शिवारात पेट्रोलिंग करत होते. सायंकाळी साडेसहा वाजेच्या सुमारास पारधी पिढी भागात एक व्यक्ती संशयास्पद रितीने फिरताना पोलिसांना आढळून आली.
पोलिसांनी तातडीने पुढे होऊन संशयित रामण पवार याची झडती घेतली असता, त्याच्याकडे एक धारदार लोखंडी कत्ती मिळून आली. सार्वजनिक ठिकाणी अशा प्रकारचे घातक शस्त्र बाळगून तो लोकांच्या जीवितास धोका निर्माण होईल अशा अविर्भावात वावरत होता. त्याच्याकडे या शस्त्राबाबत कोणताही अधिकृत परवाना नव्हता. पोलिसांनी तात्काळ ते शस्त्र जप्त करून त्याला ताब्यात घेतले.
शस्त्र कायद्यान्वये गुन्हा दाखल
याप्रकरणी शिराढोण पोलीस ठाण्याचे पोलीस अंमलदार किरण पवार यांनी दिलेल्या प्रथम खबरीवरून (FIR) आरोपी रामण पवार याच्याविरुद्ध ‘शस्त्र कायदा’ (Arms Act) कलम ४, २५ सह ‘महाराष्ट्र पोलीस अधिनियम’ कलम १३५ अन्वये गुन्हा नोंदवण्यात आला आहे. या प्रकरणाचा पुढील तपास शिराढोण पोलीस करत आहेत.
