धाराशिव जिल्ह्यात चोऱ्यांचे सत्र! धावत्या बसमध्ये महिलेचे ३.८० लाखांचे दागिने लंपास;

धाराशिव: जिल्ह्यात चोऱ्यांचे प्रमाण वाढत असल्याचे चित्र असून भूम आणि नळदुर्ग पोलीस ठाण्याच्या हद्दीत चोरीच्या दोन वेगवेगळ्या घटना समोर आल्या आहेत. जामखेड ते भूम प्रवासादरम्यान एका महिला प्रवाशाचे तब्बल ३ लाख ८० हजार रुपये किमतीचे सोन्या-चांदीचे दागिने लंपास करण्यात आले, तर दुसऱ्या घटनेत गंधोरा शिवारातून शेतकऱ्याची इलेक्ट्रिक मोटार अज्ञाताने चोरून नेली. या दोन्ही प्रकरणी पोलिसांत गुन्हे दाखल झाले आहेत.

पहिली घटना: प्रवासात गर्दीचा फायदा घेत सोन्यावर डल्ला!

भूम पोलिसांनी दिलेल्या माहितीनुसार, माधुरी सूरज हिवरे (वय २८, मूळ रा. थिटे वस्ती, खराडी, पुणे, ह.मु. वंजारवाडी, ता. भूम) या शनिवारी (दि. ९ मे) रोजी प्रवासात होत्या. दुपारी १ ते अडीच वाजेच्या सुमारास त्यांनी जामखेड ते भूम असा बस प्रवास केला.

या प्रवासादरम्यान बसमधील गर्दीचा फायदा घेऊन एका अज्ञात चोरट्याने माधुरी यांच्या पर्सची चेन शिताफीने उघडली. पर्समध्ये ठेवलेले ६ तोळे ३ ग्रॅम वजनाचे सोन्याचे दागिने आणि चांदीचे पैंजण, असा एकूण ३ लाख ८० हजार रुपये किमतीचा ऐवज चोरट्याने लंपास केला. भूम येथे पोहोचल्यानंतर हा प्रकार उघडकीस आला.

गुन्हा दाखल: याप्रकरणी पीडित महिला माधुरी हिवरे यांनी बुधवार (दि. २७ मे) रोजी दिलेल्या तक्रारीवरून भूम पोलीस ठाण्यात अज्ञात चोरट्याविरुद्ध भारतीय न्याय संहिता (BNS) कलम ३०३(२) अन्वये गुन्हा नोंदवला असून, पोलीस तपास करत आहेत.

दुसरी घटना: गंधोरा शिवारातून ५ एचपीची मोटार चोरीला

चोरीची दुसरी घटना नळदुर्ग पोलीस ठाण्याच्या हद्दीत घडली. तुळजापूर तालुक्यातील गंधोरा येथील शेतकरी प्रवीण पद्माकर पाटील (वय ४०, रा. गंधोरा) यांचे गंधोरा शिवारात शेत गट नंबर ३११ मध्ये शेत आहे.

प्रवीण यांनी विहिरीवर शेतीला पाणी देण्यासाठी १३ हजार रुपये किमतीची ५ एचपी (HP) क्षमतेची इलेक्ट्रिक मोटार बसवली होती. सोमवार, दि. २५ मे रोजी दुपारी चार वाजेच्या सुमारास अज्ञात चोरट्याने ही विद्युत मोटार विहिरीवरून चोरून नेली. पाणी उपसण्यासाठी शेतात गेल्यानंतर मोटार गायब असल्याचे प्रवीण यांच्या निदर्शनास आले.

गुन्हा दाखल: याप्रकरणी शेतकरी प्रवीण पाटील यांनी बुधवार (दि. २७ मे) रोजी नळदुर्ग पोलीस ठाण्यात तक्रार दिली. त्यानुसार अज्ञात व्यक्तीविरुद्ध भारतीय न्याय संहिता (BNS) कलम ३०३(२) अंतर्गत गुन्हा दाखल करण्यात आला आहे. पुढील तपास नळदुर्ग पोलीस करत आहेत.

नागरिकांना आवाहन: महामंडळाच्या बसमधून प्रवास करताना महिलांनी आपल्या दागिने व पर्सची काळजी घ्यावी, तसेच शेतकऱ्यांनी शेतातील साहित्याबाबत सतर्क राहावे, असे आवाहन पोलिसांतर्फे करण्यात आले आहे.