धाराशिव: महाराष्ट्र शासनाने प्रतिबंधित केलेल्या सुगंधित गुटखा आणि तंबाखूच्या बेकायदेशीर वाहतुकीविरोधात धाराशिव शहर पोलिसांनी मध्यरात्री मोठी कारवाई केली आहे. बार्शी आणि धाराशिव येथील तस्करांनी काळ्या रंगाच्या स्कॉर्पिओ गाडीतून चालवलेली लाखो रुपयांची गुटखा तस्करी पोलिसांनी उधळून लावली. तेरणा इंजिनिअरिंग कॉलेजसमोरील हायवेवर सापळा रचून पोलिसांनी स्कॉर्पिओसह तब्बल २५ लाख ३६ हजार ८०० रुपयांचा मुद्देमाल जप्त केला आहे. याप्रकरणी सोलापूर, कर्नाटक आणि धाराशिव येथील ५ जणांविरुद्ध शहर पोलीस ठाण्यात गुन्हा दाखल करण्यात आला आहे.
हायवेवर मध्यरात्री पोलिसांनी लावला सापळा
पोलिसांकडून मिळालेल्या प्राथमिक माहितीनुसार, धाराशिव शहर पोलीस ठाण्याचे प्रभारी अधिकारी तथा पोलीस निरीक्षक कुमार दराडे आणि उपविभागीय पोलीस अधिकारी (SDPO) सुरेशकुमार राऊत यांचे पथक १२ जुलै २०२६ रोजी रात्री हद्दीत पेट्रोलिंगवर होते.
रात्री ११:४५ वाजण्याच्या सुमारास तेरणा इंजिनिअरिंग कॉलेजसमोरील हायवेवरून एक संशयास्पद काळ्या रंगाची स्कॉर्पिओ गाडी (क्रमांक MH-25 BF-3696) जात असताना पोलीस पथकाने ती थांबवली. पोलिसांनी गाडीची तपासणी केली असता, त्यात मोठ्या प्रमाणावर प्रतिबंधित गुटख्याचा साठा छुप्या पद्धतीने वाहतूक केला जात असल्याचे उघड झाले. पोलिसांनी गाडीत असलेल्या मुख्य दोन आरोपींना जागीच ताब्यात घेतले.
स्कॉर्पिओसह २५.३६ लाखांचा मुद्देमाल जप्त
पोलिसांनी या कारवाईत खालील मुद्देमाल जप्त केला आहे:
१) डायरेक्टर स्पेशल पान मसाला (Director Special Pan Masala): एकूण १८०० पॅकेट्स (४० गोण्या), किंमत ९ लाख ७ हजार २०० रुपये.
२) शॉट लक्झरी च्युइंग टोबॅको (Shot Luxury Chewing Tobacco): एकूण १८०० पॅकेट्स (४० गोण्या), किंमत १ लाख २९ हजार ६०० रुपये.
३) स्कॉर्पिओ गाडी: काळ्या रंगाची वाहन क्र. MH-25 BF-3696, किंमत १५ लाख रुपये.
-
एकूण जप्त मुद्देमाल: २५ लाख ३६ हजार ८०० रुपये.
कर्नाटक आणि बार्शी कनेक्शन; ५ तस्करांवर गुन्हा
ताब्यात घेतलेल्या आरोपींची कसून चौकशी केली असता, हा प्रतिबंधित गुटखा स्वतःच्या फायद्यासाठी विक्री करण्याच्या उद्देशाने आणला असल्याचे निष्पन्न झाले. या रॅकेटमध्ये कर्नाटक आणि सोलापूरचे कनेक्शन समोर आले असून, पोलिसांनी खालील ५ जणांविरुद्ध गुन्हा नोंदवला आहे:
१) गणेश मारुतीराव धुमाळ (वय ३४ वर्षे, रा. उपळाई रोड, एकता गणपती चौक, बार्शी, जि. सोलापूर)
२) रोहन कदम (रा. आळणी, ता. जि. धाराशिव)
३) जाफर जमादार (रा. आळण, राज्य कर्नाटक)
४) अमोल गुंजाळ
५) पवन जीवन पौळ (रा. आळणी, ता. जि. धाराशिव).
शहर पोलिसांत गुन्हा दाखल
या प्रकरणी पोलीस अंमलदार शशिकांत रामहरी जाधवर (वय ३८ वर्षे) यांनी सरकारतर्फे दिलेल्या फिर्यादीवरून १३ जुलै २०२६ रोजी पहाटे ३:४६ वाजता धाराशिव शहर पोलीस ठाण्यात गु.र.नं. ३१९/२०२६ अन्वये गुन्हा दाखल केला. पोलिसांनी सर्व आरोपींवर भारतीय न्याय संहिता (BNS) २०२३ चे कलम १२३, २७४, २७५ (अन्न पदार्थात भेसळ व धोकादायक वस्तूंची विक्री), २२३ आणि ३(५) (समान उद्देश) नुसार गुन्हा नोंदवला आहे. सहाय्यक पोलीस निरीक्षक (API) होमकर यांनी हा गुन्हा दाखल केला असून, पोलीस उपनिरीक्षक (PSI) डिघोळे या प्रकरणाचा पुढील सखोल तपास करत आहेत.
