धाराशिव : कुणाला वाचनाचा छंद, कुणाला संगीताचा… पण धाराशिवात सध्या रस्ता अडविण्याच्या वादावरून एक वेगळाच ‘छंद’ चर्चेत आला आहे!
‘असावा एक छंद…’
ठळक अक्षरातील हे वाक्य लिहिलेली जुनी गाडी सध्या धाराशिवकरांचे लक्ष वेधून घेत आहे.
पंचायत समिती परिसरातून समता नगरकडे जाणारा गेल्या सुमारे ४० वर्षांपासून वापरात असलेला रस्ता काही दिवसांपूर्वी कंपाऊंड करून बंद करण्यात आला. संतप्त नागरिकांनी हा अडथळा दूर करत रस्ता पुन्हा खुला केला. मात्र, त्यानंतर पुन्हा एक जुनी गाडी रस्त्यात उभी करून मार्ग बंद करण्यात आला.
मग नागरिकांनीही ‘वाराला प्रतिवार’ केला!
एक बंद पडलेली जुनी गाडी थेट जिल्हा परिषदेसमोर आणून उभी करण्यात आली. गाडीवर बॅनर झळकला आणि त्यावरील ‘असावा एक छंद…’ या ठळक शब्दांनी संपूर्ण आंदोलनाची चर्चाच बदलून टाकली.
‘जिल्हा परिषद अध्यक्ष अर्चनाताई पाटील यांच्या तोंडी आदेशानुसार मागील ४० वर्षांचा रस्ता बंद करण्यात आला आहे’, असा दावा नागरिकांकडून करण्यात आला आहे.
एकीकडे रस्ता अडविण्यासाठी जुनी गाडी… दुसरीकडे निषेधासाठी बंद गाडी!
आता धाराशिवकर विचारत आहेत — ‘असावा एक छंद… पण रस्ता अडविण्याचाच का?’ 😄
रस्त्याच्या या ‘वार प्रति वार’मध्ये पुढचा डाव प्रशासनाचा की नागरिकांचा? याकडे आता शहराचे लक्ष लागले आहे.
